Husanov: O‘zbekiston EOIIga qo‘shilsa migrantlarning patent to‘lovi bekor bo‘ladi
O‘zbekiston senatning yigirma beshinchi yalpi majlisi arafasida Fan, ta’lim va sog‘liqni saqlash masalalari qo‘mitasida o‘tkazilgan yig‘ilishda senatorlar O‘zbekiston Evrosiyo iqtisodiy ittifoqiga qo‘shilgan taqdirda mehnat migrantlarining Rossiya Federatsiyasi hududida mehnat qilgani uchun undiriladigan patent to‘lovining bekor bo‘lish yo bo‘lmasligi bilan qiziqishdi.
Qo‘mita yig‘ilishida Xalqaro mehnat tashkilotining Ish bilan ta’minlash sohasidagi siyosat to‘g‘risidagi konventsiyasi ijro etilishi yuzasidan axborot bergan Bandlik va mehnat munosabatlari vaziri Nozim Husanov O‘zbekiston EOIIga qo‘shilgan taqdirda patent to‘lovi bekor bo‘lishini ma’lum qildi.
“O‘zbekiston Evrosiyo iqtisodiy ittifoqiga qo‘shilgandan keyin patent to‘lovi bekor bo‘ladi. Ittifoqqa a’zo davlatlarning fuqarolari teng huquqli bo‘lib qoladi”, – dedi Nozim Husanov.
Avvalroq senator Odiljon Iminov O‘zbekiston Evrosiyo iqtisodiy ittifoqiga a’zo bo‘lsa, o‘zbekistonlik migrantlar hayoti qulaylashishi, mehnat muhojirlariga bo‘lgan munosabatda ijobiy o‘zgarishlar paydo bo‘lishini aytgan edi.
Izoh: Rossiya O‘zbekistonni EOIIga a’zo bo‘lib kirishi uchun kuchli bosim o‘tkazayotgani tobora oshkor bo‘lib bormoqda. Shu sababli ham o‘zbek hukumati ikkinchi yoki uchinchi darajali amaldorlar orqali odamlar quloqlarini ko‘niktirish va bu tashkilot haqida ommada iloji boricha ijobiy fikrni shakllantirishga harakat qilmoqda. Buning uchun eng maqbul echim go‘yoki Rossiyada mehnat qilayotgan millionlab o‘zbekistonliklar manfaatlari ko‘zlanayotgandek muhitni paydo qilishdan iboratdir.
O‘z vaqtida qirg‘iz hukumati ham Rossiya bosimi ostida mamlakatni ittifoqqa olib kirishda “Qirg‘iziston uchun 170 million kishilik bozor ochilishi, ittifoq hududida tovarlar, xizmatlar va ishchi kuchining erkin harakati ta’minlanishi va iqtisodiyot sohasida yagona siyosat yuritilishini” va’da qilishgan edi. Ammo tashkilotga a’zo bo‘lgandan buyon o‘tgan 4 yildan oshiqroq vaqt bularning barchasi Rossiya bosimidan qutulish uchun qabul qilingan qaror va va’dadan boshqa narsa bo‘lmaganligini ko‘rsatib turibdi. Qirg‘iziston tashkilotga a’zo bo‘lganidan buyon xalq va davlat uchun biror ijobiy o‘zgarish sodir bo‘lmadi. Fitosanitariya va veterinariya talablariga javob bermaganlik bahonasi bilan qirg‘iz qishloq xo‘jalik mahsulotlarini tashkilotga a’zo boshqa davlatlarga o‘tkazmaslik, mehnat muhojirlariga xaydovchilik guvohnomasi bahonasi bilan bosim o‘tkazish, Rossiyadan jo‘natilayotgan pul mablag‘lari uchun cheklov joriy qilish va yana boshqa ko‘plab ishlar bu tashkilot Rossiyaning iqtisodiy manfaatlarini ro‘yobga chiqarish uchun tashkil etilganligiga dalolat qiladi. Qirg‘izistonda bo‘ladigan parlament saylovlari yaqinlashib borgani sari deputatlar ham xalqqa yaxshi ko‘rinish ilinjida ittifoqqa a’zo bo‘lish Qirg‘iziston uchun hech qanday foyda keltirmagani haqida gapira boshlashdi. Holbuki, aksari hozir ham deputat sifatida faoliyat olib borayotgan Jokorku Keneshning V chaqirilishidagi deputatlari 2015-yil 20-may kuni o‘zlari hatto tanishib ham chiqmagan “Qirg‘izistonning EOIIga qo‘shilish to‘g‘risidagi” qonunni qariyib bir ovozdan tasdiqlab berishgan edi.
26-noyabr kun bo‘lib o‘tgan JKning iqtisodiy va moliyaviy qo‘mitasi yig‘ilishidagi Kenjebek Bokoev ham ayni shu masalani ko‘targan edi.
“Yana, bizga valyutalarning ham to‘sqinliksiz harakat qilishi haqida gapirilgan edi. Lekin, bunga ham cheklovlar bor. Evrosiyo iqtisodiy ittifoqiga qo‘shilganidan keyin Qirg‘iziston barcha frontlarda yutqazdi, ayniqsa qishloq xo‘jaligida. Nima uchun Rossiya va Qozog‘istondan tirik hayvonlarni import qilishadi-yu, Qirg‘izistondan olib kirish mumkin emas”, – dedi Bokoev…
Abdurahmon Odilov
