Qirg‘iziston ko‘p vektorli tashqi siyosatni ko‘zlaydi
Bu haqda prezident Sooronbay Jeenbekov 12-noyabrda Bishkekdagi Ala-Archa davlat qarorgohida bo‘lib o‘tgan Tashqi ishlar vazirligi tashkil etilganini 75 yilligiga bag‘ishlangan tadbirda aytib o‘tdi.
“Tashqi siyosatning yangi kontseptsiyasiga muvofiq, Qirg‘iziston ko‘p vektorli, o‘zaro teng va pragmatik tashqi siyosat yuritishni ko‘zlaydi. So‘nggi ikki yil ichida qo‘shni davlatlar, ittifoqdosh va strategik hamkorlar bilan o‘zaro hamkorlikni yanada mustahkamlash bo‘yicha jiddiy harakatlar olib borilyapti”, – dedi Jeenbekov.
Davlat rahbari Markaziy Osiyo davlatlari – Qozog‘iston, O‘zbekiston, Tojikiston, Turkmanistonga rasmiy tashriflar amalga oshirilgani, bundan tashqari, Rossiya, Xitoy, Turkiya va Evroittifoq davlatlariga amalga oshirgan davlat va rasmiy tashriflar ijobiy natija berganini qo‘shimcha qildi.
Prezidentning ma’lum qilishicha, ayni vaqtda Qirg‘iziston dunyoning 163 mamlakati bilan diplomatik munosabatlar o‘rnatgan.
Izoh: Rivojlanayotgan davlatlar prezidentlari o‘zlarini ishonchliroq va xavfsizroq his etishlari va yirik mustamlakachi davlatlar tahdid va bosimlaridan yiroq bo‘lishga qaratilgan harakatlarini ko‘p vektorli tashqi siyosat deb oqlashga intilishadi. Bu siyosat orqali ular Rossiya, AQSh va Xitoy kabi davlatlarni birdek rozi qilish asosida harakat qilishadi.
Markaziy Osiyo respublikalaridagi siyosiy doira qatori Qirg‘izistondagi siyosiy doira vakillari ham, etakchi guruh vakillari ham aynan shu asosda fikr yuritishadi. Mintaqadagi davlatlar prezidentlarining fikr yuritishi ham xuddi Jeenbekov fikrlashi bilan bir xil. Ya’ni, ular mustamlakadan qutulish va mustaqil bo‘lish haqida fikrlashdan juda uzoq. Ular “mustamlakachilarni ranjitib bo‘lmaydi, ularga zid bo‘lgan iqtisodiy yoki siyosiy yo‘nalish olib borish mumkin emas”, deb bilishadi. Shu sababli ham bu kabi prezident va siyosiy doiralardan iqtisodiy mustaqillik, rivojlanish haqida fikrlash yoki biror islohotlar kutib bo‘lmaydi.
Abdurahmon Odilov
