بِسْمِ اللهِ الرَّحْمٰنِ الرَّحِيمِ
Jazoir ahli rejimning oʻjarligi sababli fuqarolar isyoni degan tahdid ostida qolmoqda
Vatan arabiy veb-saytining (hijriy 1440 yil 2 zul-hijja, milodiy 2019 yil 3 avgust shanba kuni nashr qilingan) xabarida bunday deyiladi:
“Juma kuni poytaxt Jazoirda yirik sondagi namoyishchilar ketma-ket “24-marsh”da qatnashishdi hamda birinchi marta “fuqarolar isyoni”ga daʼvat qilishdi. Namoyishchilarni bunday daʼvat qilishiga undagan narsa armiyaning norozilik namoyishlari ortidan xavfsizlik kuchlarini keng miqyosda joylashtirgani boʻldi.
Juma kuni poytaxt markazida kuch ishlatar tizimlar qurshovi ostida namoyishchilar oʻzlarining shiorlari va hayqiriqlarida “fuqaroviy isyon boshlanmoqda”, deyishdi.
Fuqaroviy isyonga boʻlgan chaqiriqlar Jazoirning uchinchi va toʻrtinchi shaharlari boʻlgan Konstantina bilan Annoba shaharlarida ham yangradi. Shuningdek, bu chaqiriq mahalliy jurnalistlarga koʻra, Burj Bu-Arririj shahrida ham kuzatildi. Ayni shahar poytaxt Jazoirdan 150 km. uzoqlikda joylashgan boʻlib, norozilik harakati qalʼalaridan biri hisoblanadi.
Namoyishlarda odamlar rejimga qarshi hamda 2019 yil 2 aprelda sobiq prezident Abdulaziz Buteflika isteʼfo berganidan beri Jazoirdagi kuchli figura hisoblangan armiya qoʻmondoni general-leytenant Ahmad Qoyid Solihga qarshi hayqirdilar.
Shu bilan birga, namoyishchilar muvaqqat prezident Abdulqodir ibn Solihning yurtni siyosiy va konstitutsiyaviy krizisdan qutqarish yoʻlida qilgan taklifini muhokama qilishga qarshi “isyon bilan muloqot yoʻq”, degan soʻzlarni aytdilar.
Roya gazetasining 2019 yil 7 avgust chorshanba kungi 247-sonidan
