MXDQ: Babanov qaytsa javobgarlikka tortiladi
Agar Jogorku Kengesh sobiq deputati Omurbek Babanov Qirgʻizistonga qaytsa, unda u qonun doirasida javobgarlikka tortiladi. Bu haqda mamlakat Milliy xavfsizlik davlat qoʻmitasi matbuot xizmati xabar bermoqda.
Kuni kecha Omurbek Babanovning ijtimoiy tarmoqlardagi sahifalarida Navroʻz bayrami munosabati bilan tabrik matni eʼlon qilindi. “Tez orada koʻrishguncha”, – deyiladi matn oxirida.
Avvalroq, MXDQ Omurbek Babanov bilan bogʻliq ikkita jinoiy ish boʻyicha tergov olib borayotgani xabar qilingandi.
Birinchisi – Oʻsh shahri Amir-Temur mikrorayonidagi nutqi boʻyicha Babanov va boshqa shaxslarga nisbatan qoʻzgʻatilgan jinoiy ish.
Ikkinchisi – hokimiyatni zoʻrlik bilan qoʻlga olish va ommaviy tartibsizliklarga tayyorgarlik koʻrish yuzasidan jinoiy ish.
