Mayk Pompeo: AQSh Eron agressiyasining har qanday alomatini bostiradi
AQSh Davlat kotibi Eronning agressiyasini jilovlash uchun Pentagon va AQShning mintaqadagi ittifoqchilari bilan yaqindan hamkorlik qilishi toʻgʻrisida bayonot berdi.
AQSh Davlat kotibi Mayk Pompeo 21 may kuni Vashingtonda konservativ Heritage jamgʻarmasida Eron boʻyicha yoʻl xaritasini eʼlon qildi.
Davlat kotibi Eronga nisbatan AQShning 12 talabi toʻgʻrisida bayonot berdi. Talablar orasida Suriyadan Eron harbiylarini chiqarish talabi ham bor. Pompeo, shuningdek, Eron tomonidan qoʻlga olingan har bir amerikalikni vataniga qaytarish uchun zarur boʻlgan barcha choralar koʻrilishini ham bildirdi.
Bundan ikki hafta avval AQSh prezidenti Donalьd Tramp Vashington Tehronning yadroviy dasturi boʻyicha Eron va jahonning qudratli davlatlari oʻrtasida 2015 yil imzolangan kelishuvdan chiqishini eʼlon qilgan edi.
Kelishuvda Eron yadroviy dasturi cheklanishi evaziga Tehronga qarshi joriy qilingan iqtisodiy sanktsiyalarni bekor qilish koʻzda tutilgan.
Rasmiy nomi “Qoʻshma tadbirlar mukammal rejasi” boʻlgan kelishuvni AQShdan tashqari Xitoy, Rossiya, Frantsiya, Germaniya hamda Britaniya imzolagan.
AQShning kelishuvdan chiqish qarorini Yevropa davlatlari tanqid qildi. Ular Vashington ishtirokisiz shartnomani saqlab qolishga urinmoqda.
Xitoy va Rossiya ham kelishuvni qoʻllashda davom etish tarafdori.
