Shaxzodalarni “Blekuoter” tergov qilmoqda
Saudiya Arabistonida boshqaruvni qoʻlga olgan valiahd shahzoda Muhammad bin Salmon korruptsiyaga qarshi kurashni roʻkach qilib hibsga olgan yuqori darajali yuzlab masʼullar, shu jumladan shaxzodalar va vazirlar qiynoqqa solinganligi haqida yangi daʼvolar yuzaga chiqa boshladi. “Daily Mail” gazetasining Saudiyadagi manbasi tarqatgan maxsus xabarga koʻra, Riyodda hibsxona markaziga aylantirilgan Ritz Karlton mehmonxonasida tutilayotgan mahbuslar AQShning oʻziga xos xavfsizlik tashkiloti “Blekuoter”ning yangi qanoti “Akademi” tarafidan tergov qilinmoqda.
“Blekuoter” AQShning maxfiy tashkilotidir. Uning Afgʻoniston va Iroqda portlashlar, suiqasdlar va qotilliklar kabi maxsus maxfiy operatsiyalar va boshqa iflos ishlarni amalga oshirganligi bir necha bor isbotlangan.
“Ularni urib, kaltaklashmoqda, haqorat qilib, qiynoqqa solmoqda. Butunlay “sindirish”ni xohlashmoqda”, “Baʼzi tergov jarayonida valiahd shaxzodaning shaxsan oʻzi ishtirok etyapti. Katta narsa haqida soʻz ketganda savollarni shaxzodaning oʻzi beradi va shirin til bilan muomala qiladi. U chiqqandan keyin xavfsizlik xodimlari kirib, qiynoqqa sola boshlaydi”, deya yozadi gazeta.
Shuningdek, xabarda aytilishicha, tergov jarayonida oyoqlaridan shiftga osilib, kaltaklangan va qiynoqlarga solingan kishilar orasida 19 milliard dollar boyligi bilan dunyoning eng boy 50 kishi roʻyxatidan oʻrin olgan shahzoda al-Valid bin Talal ham bor.
Manbaga koʻra, shahzoda Muhammad bin Salmon hibsga olingan kishilarning hozirgacha 194 milliard dollarlik mol-mulkini va bank hisobini musodara qilgan. Bundan avval mahbuslarga boyliklarini topshirib ozod boʻlishi taklif qilingan edi. Valiahd shahzoda Muhammad ibn Salmon “The New York Times”ga bergan intervьyusida aytishicha, hozirda shahzodalar va milliarderlarning aksariyati oʻz mablagʻlarining bir qismini topshirib, ozodlikka chiqishga rozilik bildirishgan.
