Rossiyada Facebook taqiqlanishi mumkin
“Roskomnadzor” rahbari Aleksandr Jarov Rossiyada Amerikaning Facebook ijtimoiy tarmogʻini bloklash bilan tahdid qildi. Kompaniyadan shaxsiy maʼlumotlarni saqlash toʻgʻrisidagi qonunga rioya etish talab qilindi.
Idora rahbarining soʻzlariga koʻra, Facebook 2018 yilda mamlakatdagi faoliyatini qonunchilikka muvofiqlashtirishi zarur.
“Qonun hamma uchun majburiy. Har qanday vaziyatda biz yo qonunning bajarilishiga erishamiz, yoki kompaniya Rossiya Federatsiyasi hududida ishlashni toʻxtatadi”, – dedi Jarov.
U LinkedIn ijtimoiy tarmogʻi bilan ham shunga oʻxshash vaziyat yuzaga kelganini yodga soldi. Jarov muammoning yechimi uchun muddatga rioya qilishga vaʼda berdi va “Facebook – mashhur ijtimoiy tarmoq, ammo noyob emas”ligini qoʻshimcha qildi.
“Roskomnadzor” rahbarining soʻzlariga koʻra, kompaniya vakillari variantlarni koʻrib chiqishmoqda, lekin hozircha rasmiy xat yoʻllanmadi.
“2017 yil oxirigacha bu yoʻnalish boʻyicha tekshiruvlar rejada yoʻq, 2018 yilda oʻylab koʻramiz”, – deydi u.
Twitter maʼmuriyati, oʻz navbatida, qonunni bajarish muddatlarini belgiladi: mikrobloglar tarmogʻi 2018 yilning oʻrtasiga borib maʼlumotlarni mahalliylashtiradi.
