Rossiya xavfsizlik kengashi kotibi Toshkentga keldi
Oʻzbekiston tomonining taklifiga binoan Rossiya xavfsizlik kengashi kotibi Nikolay Patrushev boshchiligidagi Rossiya delegatsiyasi Toshkentga keldi.
OʻzA xabariga koʻra, tashrif doirasida 2017 yil 20 sentyabr kuni Toshkent shahrida Oʻzbekiston respublikasi va Rossiya xavfsizlik kengashlari apparatlari oʻrtasida navbatdagi maslahatlashuvlar boʻlib oʻtdi.
Muzokaralar chogʻida tomonlar Oʻzbekiston va Rossiya oʻrtasida xavfsizlik sohasidagi hamkorlikning bugungi holati va istiqbollarini muhokama qildi. Jumladan, huquqni muhofaza qilish va bojxona organlari, favqulodda vaziyatlar vazirliklari oʻrtasidagi oʻzaro aloqalar, shuningdek, harbiy va harbiy-texnik hamkorlikni rivojlantirishning ustuvor yoʻnalishlarini koʻrib chiqdilar. Mintaqaviy va xalqaro xavfsizlikning dolzarb masalalari yuzasidan fikr almashildi.
Tomonlar joriy yilning 4-5 aprel kunlari Oʻzbekiston prezidenti Shavkat Mirziyoyevning Rossiya Federatsiyasiga davlat tashrifi doirasida erishilgan kelishuvlarni oʻz vaqtida amalga oshirish masalalariga alohida eʼtibor qaratdi.
Turkiston:
Oʻzbekiston prezidenti Shavkat Mirziyoyev AQShda boʻlib oʻtgan BMT assambleyasida, Gʻarb olamining siyosiy elitasi tomonidan mamnuniyat bilan kutib olindi. Oʻzbekiston MXX raisi Rustam Inayatovni qora roʻyxatga kiritganini eʼlon qilgan AQSh bu bilan, Mirziyayevni qoʻllab quvvatlashga tayyor ekaniga ishora qildi.
Shavkat Mirziyoyev Oʻzbekistonda islohiy harakatlarni bir necha yil oldinga ildamlatib yuborayotgandek, bir qator siyosiy, moliyaviy va iqtisodiy qadamlar tashladi. Uning bu shijoat bilan, tavakkal qilib olib borayotgan islohiy harakatlaridan Gʻarb olami ham, Rossiya ham vaziyatlarga munosabat bildirishda shoshilib qolishyapti. Har ikkala tomon ham Oʻzbekiston prezidentining pozitsiyasi va strotegik rejalarini anglab ulgura olishmay, undan xavfsiray boshlashyapti. Buning ustiga islohiy harakatlarga qarshi Mirziyayevning asosiy raqibi boʻlgan MXX raisi Inayatovning ogʻir dardga chalingani haqida xabarlar tarqay boshladi.
Albatta Oʻzbekistonni oʻzining mustamlakasi deb bilgan Rossiya, u yerdagi holatga eʼtiborsiz qarab tura olmaydi. Patrushevning tashrifi ham, mamlakatning strotegik pozitsiyalarda Rossiya bilan birga yoki aksincha ekanini tekshirish maqsadida uyushtirilgan. Hozirda Oʻzbekiston boshqaruv tizimi bilan MXX boshchiligida Karimovdan qolgan siyosiy rejimni saqlab qolish tarafdorlari oʻrtasida juda katta jarlik paydo boʻlib, vaziyat oʻta nochor va keskin holatda turibdi. Rossiya bu holatga kuchli taʼsir oʻtkaza olishi mumkin. Yaʼni u Patrushev orqali Mirziyayevning sistemasiga qarshi MXXni qoʻllab yuborishi mumkin ekaniga ishora qilyapti. Bu esa mamlakatda hatto hokimiyatni harbiy toʻntarishgacha olib borishi ham mumkin.
Mirziyayevning siyosiy ambitsiyalari oʻta kuchli boʻlgani bilan, mamlakatdagi hozirgi vaziyat, xalqaro siyosatda taʼsir quvvatiga ega davlatlarning taʼsiri ostiga oʻtib boryapti. Yaʼni Oʻzbek siyosiy elitasi ikkiga boʻlinib, bir biriga ashaddiy raqibga aylanib boryapti. Bu esa, mustamlakachi davlatlar uchun oʻta kulay fursat kelganini anglatadi. Ular bir tomonni ikkinchi tomon bilan qoʻrqitib, vaziyatdan oʻz manfaati yoʻlida maksimal darajada foydalanib olmoqchi boʻlishadi. Ularning manfaatlari siyosiy, iqtisodiy, saqofiy va harbiy sohalarda boʻlishi mumkin. Vaziyatlarning ketuvidan ogoh boʻlib boraylik, birodarlar!
