Rossiya “Iskandar-M” raketasini Tojikistonda sinovdan oʻtkazdi
Tojikistonda oʻtkazilayotgan “Antiterror-2017” mashgʻulotlari davomida Rossiya “Iskandar-M” ballistik raketasini sinovdan oʻtkazdi. Bu “Iskandar-M” tezkor-taktik raketa majmualarini Rossiya tashqarisidagi harbiy mashgʻulotlarda birinchi marta qoʻllashi boʻldi.
Markaziy harbiy okrug qoʻmondonligi maslaxatchisi polkovnik Yaroslav Roshchupkinning 1-iyun kuni maʼlum qilishicha, sinov vaqtida mazkur raketa bilan terrorchilarning tojik-afgʻon chegarasidan 15 km uzoqlikdagi ehtimoliy lageriga zarba berildi.
Roshchupkinning qoʻshimcha qilishicha, mashgʻulotlar davomida Rossiyaning “Uragan” raketa tizimi ham qoʻllanilgan.
Tojikiston mudofaa vazirligi matbuot kotibi Farudin Maxmadaliyevning soʻzlariga koʻra, mashgʻulotlarga Rossiya va Tojikistonning 4500 harbiylari jalb qilingan. Rossiya mashgʻulotlarga 2000 askar, 30 yaqin samolyot va vertolyot joʻnatgan.
