Isroil kuchlari “pichoq bilan hujum qilishga urinish” bahonasida falastinliklarni otib tashlash holatlari kupayib bormoqda. Isroil politsiyasi Sharqiy Quddusdagi Masjidul-Aqsoning ichida pichoq bilan hujum qilishga uringanlikda ayblab yana bir yosh qizni otib oʻldirdi. Kamida 20 marta oʻq uzilishi oqibatida 16 yoshli Fotima Hojichi hayotdan koʻz yumdi. Fotima yahudiylar oʻqidan jarohat olib, jontalash boʻlib yotgan paytda unga yordam bermoqchi boʻlgan Qudduslik bir yigit ham kaltaklanib, soʻng qamoqqa olinganligi aytilmoqda.
Voqea ortidan Falastin Tashqi ishlar vazirligi darhol bayonot chiqarib, Isroil hukumatini “xumoridan chiqquncha” ogʻziga kelgan gaplar bilan aybladi. Xalqaro hamjamiyatdan Falastin xalqini Isroil zulmidan himoya qilish talab qilingan va qotillarning hisob berishi lozimligi taʼkidlangan bayonotda 16 yoshli falastinlik qizning sovuqqonlik bilan oʻldirilishiga haqiqiy javobgar Binyamin Netanyaxu boshchiligidagi Isroil hukumati ekanligini qayd etildi.
“Netanyahu hukumati Fotimaning sovuqqonlik bilan oʻldirilishiga javobgardir. Fotimani qatl qilish bilan Isroil himoyasiz Falastin xalqiga nisbatan muntazam jinoyatlari roʻyxatiga yana bir jinoyatni qoʻshdi”, “Pichoq bilan hujum qilishga urinishda ayblab, 5 nafar Isroil politsiyasi bir vaqtning oʻzida bitta qizga tinimsiz oʻqlar yogʻdirishgan. Pichoq bilan hujum qilishga urinish daʼvosi Fotimaning yoniga pichoq tashlab qoʻyish bilan oʻz isbotini topmaydi”, “Xalqaro hamjamiyat Isroilning jinoyatlariga sukut saqlashda davom etishi jinoyatni davom ettirishga targʻib maʼnosini anglatadi”, deyiladi jumladan Falastin tashqi ishlar vazirligi tarafidan chiqarilgan yozma bayonotda.
Shuningdek Isroil politsiyasining jinoyatini ogʻir soʻzlar bilan tanqid qilgan Falastin Tashqi ishlar vazirligining bayonotida yahudiylar oʻqidan jarohatlanib yerda yotgan Fotimaga yana oʻq uzilishi va tez yordamga izn berilmasligi xalqaro qonunga zid ekanligini qayd etildi. Bayonotda aytilishicha, Fotima Isroil politsiyasidan 10 metr uzoq masofada boʻlgan va biror bir tahlika tugʻdiradigan darajada boʻlmagan.
