“Sputnik” xabariga koʻra, Oʻzbekiston prezidenti Shavkat Mirziyoyevning 11-15 may kunlari Xitoyga amalga oshiradigan uch kunlik safari davomida umumiy qiymati 20 milliard dollarlik 100ga yaqin kelishuvlar imzolanishi kutilmoqda. Bu haqida Oʻzbekiston matbuot-xizmati rahbari Asad Xodjayev maʼlum qilgan.
“Davlat tashrifi “Bitta kamar – bitta yoʻl” forumiga bagʻishlanadi. Bu Xitoy tomonidan amalga oshirilayotgan keng miqyosdagi forum. U 100dan ziyod davlatlar va xalqaro tashkilotlarni birlashtiradi. Biz ega boʻlgan maʼlumotlarga asosan, ushbu forumda 40dan ziyod davlat rahbarlari ishtirok etishi kutilmoqda. Ular savdo-iqtisodiy, ijtimoiy-gumanitar xarakterdagi masalalarni muhokama qiladilar. Oʻzbekiston ushbu forum doirasida faol ishtirok etishni rejalashtirgan”,- deb qayd etgan Xodjayev.
Prezident matbuot-xizmati rahbari, shuningdek, Xitoy bilan aloqalar jadal rivojlanayotganini qoʻshimcha qilgan. Jumladan, ikki davlat oʻrtasidagi tovar aylanmasi oʻtgan yilda 4,2 milliard dollarni tashkil qilgan. Xitoydan Oʻzbekistonga jalb qilingan investitsiyalar esa 8 milliard dollarga yetgan. Ikki davlat oʻrtasidagi 230 turda normativ hujjatlar imzolangan.
