AQSh bombardimon qilgan bazadan harbiy samalyot havoga koʻtarildi
Kuni-kecha AQSh tarafidan bombardimon qilinganligi daʼvo qilingan Suriyaning Shuayrat harbiy havo bazasidan Asad rejimi bugun yana foydalana boshladi. Soʻngi xabarlarga koʻra, vayron qilinganligi butun dunyoga koʻz-koʻz qilingan Shuayrat aeroportidan kecha “Sukhoi Su-22” rusumli harbiy samolyot havoga koʻtarilgan.
Bundan avval ham oshkor boʻlgan baʼzi dalillar bazaning boʻsh yerlari hujumga tutilganligini va bazadagi tanklar, samolyotlar, radar va qurol tizimlarining hech biri zarar koʻrmaganligini koʻrsatgan edi.
Turkiston:
Shuni ham nazardan qochirmaslik lozimki, Asad rejimi bundan avval ham bir necha marotaba kimyoviy hujumlarni amalga oshirib keldi. Suriyada Asad rejimi birinchi marta 2013 yil 21 Avgustda kimyoviy qurol ishlatdi. Damashqning sharqiy Gʻuta mintaqasiga uyushtirilgan mazkur hujumda 1400 tinch aholi hayotdan koʻz yumdi. Koʻpchiligi ayollar va bolalardan iborat 10000 kishi jarohat oldi. Suriya Inson huquqlari tashkiloti eʼlon qilgan hisobotga koʻra, Asad rejimi soʻngi uch yilda 162 marta kimyoviy qurol ishlatgan. Sharqiy Gʻuta hujumlaridan tashqari kimyoviy hujumlarda kamida 230 tinch aholi hayotdan koʻz yumgan.
Ammo AQSh nega – “Xoʻja koʻnsin”ga boʻlsa ham – bugunga kelib hujum qilishga oʻtdi. Oʻsha paytda ham Suriyada kimyoviy qurolni ishga solish AQSh maʼmuriyati uchun “qizil chiziqdan oʻtish” hisoblanar edi. Vashington goʻyo Suriya masalasiga aralashish uchun tashabbus boshlaganda Rossiya oʻrtaga tushdi va Asadning qoʻlidagi kimyoviy qurolni yoʻq qilish borasida oʻzaro qaror qabul qilindi.
2014 yil 19 Avgustda Suriyadagi kimyoviy qurollarni yoʻq qilish jarayoni yakuniga yetganligi eʼlon qilindi. Lekin bugungi kungacha kimyoviy hujumlarning davom etib kelishi “kimyoviy qurollarni yoʻq qilish” daʼvosi ham soxta ekanligini koʻrsatmoqda.
