Rossiya Prezidenti Vladimir Putin 2015 yil sentyabr oyida Suriyaga o’z qo’shinlarini olib kirar ekan, bundan ko’zlangan asosiy maqsad IShIDga qarshi kurash ekanligini da’vo qilgan edi. Biroq Putinning keyingi bayonotlaridan rus harbiy kuchlarining Suriyada qirg’in o’tkazishidan asosiy maqsadi IShIDga qarshi kurash emas, balki Asad hukumatini kuchaytirish ekanligi ma’lum bo’ldi.
Interfaks axborot agentligi tarqatgan xabarga ko’ra, Rossiyaning Peterburg shahrida tashkil qilingan matbuot forumida nutq so’zlagan Prezident Putin Rossiyaning Suriyaga qilgan bosqini haqida to’xtalib o’tgan. Agentlik o’zining sahifasida Putinning shunday gaplarini keltiradi: “Biz u erda vazifamizni bajarganligimiz aniqdir. Biroq, Suriyada radikal o’zgarish sodir bo’ldi deb aytish uchun juda erta. Bizning vazifamiz avvalambor Suriyada davlat tizimini va qonuniy hukumatni mustahkamlash edi”.
Rossiya rahbarining ta’kidlashicha, Rossiya o’z qo’shinlarini Suriyaga olib kirishdan ko’zlagan maqsadiga erishgan. Shunga ko’ra, Rossiya armiyasining Suriyadagi harbiy amaliyotlari Moskvaning dunyoda etakchi mamlakatlar bilan munosabatlarini qayta shakllanishiga imkon beradi.
Shuningdek, Putin o’z nutqida Suriyada “terrorizm”ga qarshi kurash yo’lida olib borilgan rus harbiy amaliyotlari chog’ida boshqa davlatlar bilan hamkorlik qilinganligini ham ilgari surdi. Rossiya rahbari bunga misol sifatida AQSh bilan munosabatlarini tilga olib o’tdi.
“Biz ikki davlat (ya’ni AQSh va Rossiya) o’rtasida axborot almashish uchun bir markaz tashkil qildik. Uzluksiz maslahatlashuvlar olib boryapmiz. Xususan shuni ta’kidlab o’tishim lozimki, Suriyada tinchlikni ta’minlash va uni nazorat qilish uchun mexanizmlar tashkil qildik”, dedi u.
