Suriyadagi mo”tadil (demokratiya tarafdori bo’lgan) muxolifat vakillarini harbiy mashqdan o’tkazish borasida AQSh va Turkiya o’rtasida oktyabr oyidan buyon hozirga qadar muzokaralar davom etib kelmoqda. Aslida bu loyiha 2014 yilning dekabr oyidan boshlanib joriy yilning fevral oyida nihoyasiga etishi kerak edi. Ma’lum sabablarga ko’ra ikki marta kechiktirilgan harbiy mashqdan o’tkazishni boshlash jarayoni shu kunlarda oxirgi bosqichiga etganligi aytilmoqda.
Hurriyat gazetasining yozishicha, 40 kishidan ortiq maxsus guruh AQShdan Turkiyaga kelgan. Mutaxassislarga ko’ra, harbiy mashqlar eng kechi bilan o’n kun ichida boshlanadi. Mashqdan o’tadigan mo”tadil muxolifat vakillarining aksariyati suriyalik turkmanlardir. Jangchilarni tanlab olish ishlarini milliy razvedka tashkiloti olib boradi.
Harbiy mashqdan o’tkazish loyihasini boshqa bir qanoti biroz avval Iordaniyada boshlangan edi. Suriyaliklarni barcha harbiy jihozlar bilan ta’minlash AQShning zimmasida. Pentagon Turkiya bilan bir qatorda Saudiya Arabistoni, Qatar va Iordaniyada bir yil ichida besh ming Suriyalik mo”tadil (demokratiya tarafdori bo’lgan) muxolifat vakillarini harbiy mashqdan o’tkazishni rejalashtirgan. Shulardan ikki mingtasi joriy yil so’ngiga qadar Turkiyada harbiy mashqdan o’tkaziladi.
Harbiy mashqdan o’tkazish sarf xarajatlari besh million dollardan ortishi aytilar ekan, bundan qanchasi Turkiyaning zimmasiga tushishi haqida ma’lumot sir tutilmoqda.
Al-Jazira telekanali jurnalisti doktor Ahmad Muvaffaq Zaydon AQShning «Suriya mo”tadil muxolifati» deb atayotgan kimsalarni mashqdan o’tkazishini Amerika manfaatlari yo’lida «malaylik qilish» bo’yicha mashqdan o’tkazish, deb atadi. Zaydon o’zining tvitterdagi hisobi orqali yuborgan tvitda bunday dedi: «Suriya mo”tadil muxolifatini mashqdan o’tkazishdan maqsad Amerikaga malaylik qilish bo’yicha mashqdan o’tazishdir, chunki qo’zg’olonchilarda mashqdan o’tganlik malakasi etarli ekanini, ularga faqat qurol-aslaha etishmayotganini har qanday go’l odam ham yaxshi biladi».
