Qirg’iziston respublikasi Milliy xavfsizlik davlat qo’mitasining “Vecherniy Bishkek” axborot agentligiga xabar qilishicha, AQSh fuqarosi qo’lga olingan va u bergan ko’rsatmalar asosida “Bir dunyo Qirg’iziston” ofisida tintuv ishlari olib borildi.
Ma’lum qilinishicha, 25 mart kuni AQSh fuqarosi Umar Farruh O’sh shahrida militsiya tomonidan hujjatlarni tekshirish uchun to’xtatilganidan so’ng qamoqqa olingan. Uni tekshirish mobaynida yonidan Hizb ut-Tahrirning yaqinda qo’lga olingan etakchisi va boshqa terroristik guruh a’zolariga qarshi qo’zg’atilgan jinoiy ishlar nusxalari, diniy-ekstremistik va terroristik mazmundagi DVD disklar topilgan. Huquqni muxofaza qiluvchi organlar tomonidan aniqlanishicha, Umar Farrux tegishli akreditatsiyasi bo’lmay turib O’sh viloyati hududida diniy vaziyat to’g’risida ma’lumot yig’ish bilan shug’ullangan.
Diniy ekspertiza natijasiga asosan O’sh shahri va O’sh viloyati bo’yicha MXDQ tomonidan AQSh fuqarosiga nisbatan Qirg’iziston jinoyat kodeksining bir nechta moddalari bo’yicha jinoyat ishi qo’zg’atilgan. Tergov davomida Umar Farrux o’z yonidan topilgan jinoyat ishi nusxalarini “Bir dunyo Qirg’iziston” nodavlat qiluvchi tashkiloti yuristi Valerian Vaxitovdan olganligini aytgan. Shuningdek uning yonidan shu tashkilot menedjeri Xusanboy Solievga tegishli tashrif qog’ozi ham topilgani xabar qilingan edi.
Shu sababli ham O’sh shahar sudi 27 mart kuni Vaxitov va Solievning ish joyi va xonadonida tintuv o’tkazish to’g’risida sanktsiya bergan edi. Xabar qilinishicha, tintuv mobaynida ularning uyi va ish joyidan diniy mazmundagi broshyuralar, varaqa, flesh karta va DVD disklar topilgan.
Shu bilan birga 48 soatga hibsga olingan AQSh fuqarosi Umar Farrux 29 mart kuni o’zining Tvitterdagi sahifasi orqali, unga nisbatan jinoyat ishi qo’zg’atilmagani va ayni vaqtda “uyiga ketayotgani”ni xabar qilgan.
Ayrim xabarlarga ko’ra, Umar Farrux O’sh shahar sudi hukmiga asosan mamlakatdan chiqarib yuborilgan.
