BMT bosh assambleyasida Suriyadagi oxirgi vaziyatlar va Jeneva konferentsiyasining kelajagiga aloqador masalalar borasida norasmiy yig’ilish tashkil qilindi.
Avval ochiq o’tkazilishi rejalashtirilgan, ammo keyinchalik yopiq holda o’tkazilgan yig’ilishda nutq so’zlagan BMT bosh kotibi Suriyadagi vaziyatdan tashvishda ekanligini bildirdi.
“BMT xavfsizlik kengashi va BMT bosh assambleyasining ko’z o’ngida Suriyada yuz minglagan insonlar hayotdan ko’z yumdi. Millionlagan suriyaliklar qochqinlarga aylandi. Shahar va qishloqlar er bilan yakson qilindi. Dunyo madaniyat me’roslari xatar ostida qoldi”, dedi bosh kotib.
Havodan tashlangan og’ir bombalar oddiy fuqarolarning hayotiga zomin bo’layotganligini urg’ulagan Pan Gi Mun “bu inqirozni harbiy yo’llar bilan hal qilish mumkin emasligini aytayotganlarning o’zlari siyosiy echimga etishni qiyinlashtirmoqda”, deya qayd etdi.
Pan Gi Mun Suriya masalasi bo’yicha maxsus vakil Lahdar Brahimiyning Jeneva-3 konferentsiyasini tashkil qilish talabiga o’z munosabatini bildirar ekan “yana qancha konferentsiya o’tkazishimiz kerak? Urush sababli to’kilgan qonlar haqida ma’lumot berish uchun yana qancha yig’ilish o’tkazishimiz kerak? Suriyada kechayotgan falokatlarni yoritish uchun ishlatadigan so’z qolmadi. Xalqaro hamjamiyatlarning bahonalari qachon tugaydi? Qachon ular bu inqirozni to’xtatish uchun harakatga keladi?”, dedi so’roq ohangda.
Suriyaning BMTdagi doimiy vakili Bashshar Ja’fariy yig’ilish davom etayotgan bir paytda majlis zalini tark etib, BMT bosh kotibi matbuot anjumani o’tkazishi uchun tayyorlangan kursiga o’tirib bayonot berdi.
Majlisda “terroristlar” (Asadga qarshi jihod qilayotgan mujohdlar) haqida hech so’z yuritilmaganligidan norozi bo’lgan Ja’fariy BMTni Suriya borasida tarafkashlikda aybladi. Uning bayonoti uzoq davom etar ekan, jurnalistlardan biri Suriyadagi saylov haqida savol berish istagi borligini bildirdi. Bundan g’azablangan Ja’fariy jurnalistlarni haqoratlab “bu mening matbuot yig’ilishim, eshitishni istamaganlar yo’qolsin”, dedi.
Jurnalistlarning so’rovlariga e’tibor bermay o’z bayonotini davom ettirgan Ja’fariy bu kursi BMT bosh kotibi uchun tayyorlanganligi va bu o’rindiq Pan Gi Munga tegishli ekanligini aytgan jurnalistga “Sen hali ham shu erdamisan”, deya o’shqirdi.
