Qirg’izistondagi AQSh aviabazasi boshlig’i polkovnik Jon Millard aviabaza mazkur mamlakatdagi o’zining barcha missiyalarini tugatayotgani haqida ma’lum qildi.
Polkovnikning so’zlariga ko’ra, baza havoda qo’shimcha yoqilg’i quyish, yuk va harbiylarni tashish hamda gumanitar va xavfsizlik bilan bog’liq vazifalarni bajarish bilan shug’ullanar edi. “Bu missiyalarni barchasi bugungi kunga kelib tugatildi. Endi bizning asosiy vazifamiz – hududni tozalash va uni Qirg’iziston hukumatiga topshirishdan iborat”, – dedi Jon Millard.
Jurnalistlar savollariga javob bera turib polkovnik, Qirg’izistonga “tayyor fantastik infratizilma bilan yangi yong’in xavfsizligi bo’limi” hamda umumiy texnikani bir qismi qolayotganini belgilab o’tdi. Shuningdek u 11 iyulga qadar “aviabazani barcha xodimlari AQShga qaytgan bo’lishi zarurligini qo’shimchalab o’tdi.
Turkiston:
Qirg’iziston prezidenti Almazbek Atambaev Rossiya bosimi ostida “Manas” aeroportidan AQSh harbiy bazasini chiqarib yuborish to’g’risida qaror qabul qilishga majbur bo’lgan edi. Prezident o’zining bu talabini “fuqaroviy aeroportda harbiy bo’linmalar bo’lmasligi kerak” deb izohlagan edi. Keyinchalik Qirg’iziston Tashqi ishlar vazirligi AQSh elchisiga 2014 yilning 11 iyulidan Markaz faliyati to’g’risidagi kelishuv tugashligini ma’lum qilib nota topshirgan edi.
Qirg’izistondan Amerika nufuzini surib chiqarishga qattiq harakat qilayotgan Putin boshchiligidagi Rossiya hukumati AQSh aviabazasi “Manas”dan chiqib ketmay turib bu erni o’z tasarrufi ostiga olishga qiziqish bildirdi. 22 fevral kuni Federal bojxona xizmatining etakchisi Andrey Belyanikov boshchiligida Rossiya davlat delegatsiyasi Qirg’izistonga keldi. Mazkur delegatsiya tashrifi natijasida Rossiya va Qirg’iziston rasmiylari “Manas” havo bazasiga sarmoya yotqizish bo’yicha memorandumga imzo chekishdi.
Rossiya davlati “Manas” havo bazasiga bir milliard rubl investitsiya yotqizishni va’da qildi. Qirg’iziston bosh vazirining birinchi o’rinbosari Joomart O’torbaev bu kelishuvni ma’qullab, “Manas aeroportida biz xab uyushtirishimiz kerak. Xorijiy o’lkalarning samolyotlari ko’proq uchib-qo’nishlari biz uchun foydali. “Manas”dan AQSh harbiy bazasi chiqib ketmoqda. Biz bu erdagi harbiy samolyotlari o’rniga oddiy fuqarolar tashuvchi samolyotlarni qabul qilishimiz kerak. Rossiya katta davlat, uning aviakompaniyalari ham ko’p. Ular bizning aeroportimiz orqali qanchalik ko’p uchishni yo’lga qo’ysa, keldi-ketdi ko’p bo’lsa bizning byudjetga shunchalik ko’proq daromad tushadi. Shuning uchun Rossiya bizga kerak”, dedi.
Norasmiy ma’lumotlarga qaraganda, Moskva Manas aeroportining 51% aktsiyasini talab qilmoqda. Shu bois ba’zi ekspertlarning fikricha, Rossiya Manas aeroportiga to’liq ega bo’lib qoladi. Hatto qirg’iz samolyotlari ham Rossiyaning qosh-qovog’iga qarashga va uchib-qo’nganligi uchun Rossiyaga pul to’lashga majbur bo’ladi.
