AQShning Afg’onistonni tiklash bosh inspektsiyasi Hilmand viloyatida millionlab dollar evaziga qurilgan, biroq hech qachon foydalanilmagan va endi buziladigan bino yuzasidan tekshiruv boshladi, deya xabar beradi NBC News.
Tekshiruvchilar ma’lumotiga qaraganda, AQSh armiyasining shtabi mazkur bino uchun 34 million dollar sarflagan.
Olti ming kvadrat metrga teng bu bino Afg’oniston janubidagi olis xilvat bir bazada joylashgan bo’lib, asosan kerakli harbiy jihozlarga ega yirik ofislardan iborat. Isitish, sovutish va ventilyatsiya sistemalariga katta mablag’ sarflangan.
Bundan tashqari, inspektorlar qimmatga tushgan binoning o’rniga yana bir shtab markazi qurilganini aniqlashdi.
34 millionli binoni afg’onlarga topshirishning iloji yo’q, chunki ular binoni saqlab turish uchun na texnik imkoniyatlarga, na etarli mablag’ga ega.
Afg’onistondan AQSh qo’shinlarining olib chiqilishi munosabati bilan bino himoyalanmaydigan hududda qoladi, shuning uchun uni buzib tashlashga eng ma’qul yo’l sifatida qaralmoqda.
