2014-yil AQSh kuchlari Afg’onistondan chiqib ketgandan keyin Markaziy Osiyoda vaziyat izdan chiqishi haqida xavotirlar kuchaygani sezilmoqda.
Ayniqsa, O’zbekiston tomonidan Xavfsizlik yuzasidan xavotirlar ko’p tilga olinadi. Yaqinda Moskvaga tashrif buyurgan Islom Karimov barcha diqqat e’tiborini xavfsizlikka qaratdi.
Karimov Rossiya prezidenti Vladimir Putin bilan uchrashuvda Markaziy Osiyoda barqarorlikni saqlashda Kreml madadidan umidvor ekanini ta’kidladi.
“Biz Afg’onistondan qo’shinlar chiqarilishidan so’ng terrorizm, ekstremizm va narkotrafik tahdidi kuchayishidan jiddiy tashvishdamiz”, – dedi Karimov.
Toshkentning xavotirlanishining sababi shundan iboratki, AQSh kuchlari Afg’onistondan chiqib ketgandan keyin u erda vaziyat yanada chigallashishi mumkin. AQSh Afg’onistonga kirayotganda “Hay barakalla” qilib turgan O’zbekistonga nisbatan tashqi tahdid o’sishi haqida gap ketmoqda.
Ammo Qozog’iston prezidenti Nursulton Nazarboyevga ko’ra 2014-yildan keyin vaziyat beqarorlashishidan xavotirlanish o’rinsizdir. Uning fikricha, bunday tashvishlanish mintaqadagi o’zgarishlarni ilg’amaslik, tushunib etmaslik bilan barobar.
AQSh nazarida esa mintaqada beqarorlikni kuchayishi faqat tashqi omillarga bog’liq emas. Buning uchun ichki omillarga ham e’tibor qaratish lozim.
AQSh Davlat kotibining Janubiy va Markaziy Osiyo bo’yicha yordamchisi Robert Bleykka ko’ra, AQSh kuchlari Afg’onistondan chiqib ketgani bilan Markaziy Osiyo bilan aloqani uzmaydi.
Robert Bleyk Qozog’istonda o’tgan matbuot anjumanida AQSh Afg’onistondan chiqib ketgandan keyin ham bu mintaqalar bilan hamkorlikni susaytirmasligini aytgan.
