Qirg’iziston prezidenti Almazbek Atambaev 18-20 iyun kunlari Sankt-Peterburg shahrida bo’lib o’tgan xalqaro iqtisodiy forumda ishtirok etdi va mazkur safari doirasida Rossiya prezidenti Vladimir Putin bilan yana bir bor uchrashib qaytdi.
Rossiya prezidenti bilan bo’lgan uchrashuv vaqtida Atambaev Qirg’iziston 1 iyuldan boshlab Yevroosiyo iqtisodiy ittifoqining to’laqonli a’zosi bo’lishiga umid bildirdi.
O’z navbatida Putin Qirg’iziston Rossiyaning Markaziy Osiyodagi muhim ittifoqchisi ekanini aytib o’tdi.
“Hoynahoy, Qirg’iziston Rossiyaning Markaziy Osiyodagi muhim hamkori va ittifoqchichi ekani haqida gapirishga hojat bo’lmasa kerak”, – deya ta’kidlab o’tdi Putin.
Uning so’zlariga ko’ra, hozir Rossiya va Qirg’iziston Yevroosiyo iqtisodiy ittifoqiga a’zolik bilan bog’liq muhim qaror qabul qilish arafasida turibdi.
“Biz o’z tomonimizdan barcha rasmiy protseduralarning eng yaqin vaqt ichida nihoyasiga etkazilishi uchun qo’limizdan kelganini qilamiz. O’ylaymanki, Qirg’iziston ham shunday qiladi”, – degan Putin.
Bunga javoban Prezident Atambaev Qirg’iziston Rossiyaning mintaqadagi nafaqat eng muhim, balki “eng ishonchli” hamkori ham ekanini ta’kidlagan.
“Rossiya bizning eng muhim, eng yaqin strategik hamkorimizdir”, – dedi Atambaev.
Atambaevning so’zlariga ko’ra, Qirg’iziston 1 iyuldan boshlab Ovrosiyo Iqtisodiy Ittifoqining to’laqonli a’zosi bo’lishga hozirlik ko’rmoqda.
