Indoneziya talabalarining aksariyati Xalifalik davlatining tarafdoridir
Indoneziyada jamoatchilik fikrini oʻrganish natijalari shuni koʻrsatdiki, mamlakatdagi maktab va universitet talabalarining aksariyati hozirgi ilmoniy demokratik hukumatdan koʻra oʻz diyorlarida Xalifalik davlati tiklanishining tarafdoridir.
Rossiyaning arab tilida chiqadigan “arabic.rt.com” sayti Reyter axborot agentligiga tayanib xabar qilishicha, markazi poytaxt Jakartada joylashgan “Alvara” tashkiloti mamlakatning qariyib yarim aholisi istiqomat qiladigan Java orolidagi maktablar va universitetlar talabalari oʻrtasida soʻrov tashkil qilgan. Soʻrovda ishtirok etgan 4200dan ortiq talabalarlarning 20% dan ortigʻi Xalifalik davlatini tiklash uchun faoliyat qilishga tayyor ekanligini bildirgan.
Oʻz navbatida, mazkur hisobot Indoneziya hukumatini oʻquv muassasalarida kuchayib borayotgan – Gʻarb taʼbiri bilan aytganda – Islomiy “ekstremistik” gʻoyalarning taʼsiridan ogohlantirdi.
“Hukumat va moʻʼtadil Islomiy tashkilotlar buning oldini olish uchun va talabalar jamoasini bundan qaytarish uchun dadil qadamlar tashlashlari lozim. Bu borada talabalar bilan ular tushunadigan tilda gaplashishlari kerak”, – deya tavsiya beriladi oʻtgan seshanba kuni eʼlon qilingan tashkilotning hisobotida.
“Arabic.rt.com” saytiga koʻra, Indoneziya prezidenti Joko Vedodo va uning hukumati “ekstremistik” guruhlarning universitetlar va maktablarda oʻsib borayotgan taʼsirini toʻxtatishga harakat qilmoqda.
“Misol uchun, oktyabr oyida prezident Vidodoning “dunyoviy davlat eʼtiqodiga zid boʻlgan har qanday ijtimoiy tashkilotlarni taqiqlash” haqidagi qarori davlat parlamenti tarafidan maʼqullandi. Mazkur yangi qonun asosida Indoneziyada birinchi oʻrinda Hizb ut-Tahrir uyushmasining faoliyati taʼqiqlab qoʻyildi. Shuningdek, prezident Vidodo mamlakat maktablarida indoneziyaliklarning pluralizmi (fikrlar xilma-xilligi, koʻppartiyaviyligi) va milliy birdamligining ahamiyati haqida bir necha bor nutq soʻzladi. Oʻtgan yilning sentyabr oyida taʼlim-tarbiyaga bagʻishlangan anjumanda Vedodo taʼlim sohasida dunyoviy eʼtiqodni mustahkamlashga chaqirdi”, deya yozadi “arabic.rt.com” sayti.
