30 may kuni Tojikistonda “Dushanbe-Antiterror-2017” xalqaro mashqlarining faol qismi boshlanadi, unda ishtirok etish uchun respublikaga rossiyalik harbiylar va aviatsiyaning qoʻshimcha kontingenti yuboriladi. Bu haqda Rossiya Markaziy harbiy okrugi qoʻshinlari qoʻmondoni yordamchisi polkovnik Yaroslav Roshupkin maʼlum qildi.
“Rossiya harbiy kontingenti “Dushanbe-Antiterror-2017” xalqaro mashqlarida ishtirok etadi, uning doirasida amaliy harakatlar 30 may kuni Tojikiston hududida boshlanadi. Mashqlar davomida quruqlikdagi qoʻshinlar qoʻshma guruhi aviatsiya koʻmagida terrorchilik guruhlari, noqonuniy qurollangan tuzilmalarga qarshi togʻli hududda kurash olib borish, shuningdek, tinchlikparvar amaliyot elementlari bilan bogʻliq masalalar boʻyicha harakat qilishadi”, – dedi Roshupkin.
Uning soʻzlariga koʻra, mashqlardagi vazifani bajarish uchun Tojikistondagi Rossiyaning 201-harbiy bazasi salohiyati kuchaytiriladi.
“Mashqlar oʻtkaziladigan tumanlarga mobil boshqaruv punktlari, uzoq, harbiy-transport, tezkor-taktik, armiya va uchuvchisiz aviatsiya, raketa qoʻshinlari va artilleriya boʻlinmalari, shuningdek maxsus topshiriqlik boʻlim va havo-desant qoʻshinlari askarlari yuboriladi. Qoʻshma guruh ishini harbiy muhandislar, tibbiyotchilar, boshqa mutaxassislar taʼminlab beradi”, – degan zobit. Shu bilan birga, u jalb etilayotgan kuchlar miqdoriga aniqlik kiritmadi.
Avval xabar qilinganidek, “Dushanbe-Antiterror-2017” MDH aksilterrorchilik markazining hamdoʻstlik davlatlari qurolli kuchlari bilan birgalikdagi ilk mashqlaridir.
Turkiston:
Rossiya Oʻrta Osiyoga harbiy yurishini davom ettirib boryapti. Uning baʼzi harakatlari Qrimni bosib olgani singari, Oʻrta Osiyoning baʼzi mamlakatlarini ham harbiy annektsiyasiga aylantirib olayotgandek tuyula boshladi. Rossiyaning Tojikiston bilan Qirgʻizistondagi harbiy harakatlari va FSB xodimlarining Qirgʻizistonda ruxsatsiz xohlagandek harbiy kiyimlarda yurish huquqiga ega boʻlishgani hamda Qirgʻiz xavfsizlik idorasining nazorat va yoʻnaltirish tizimlarini deyarli oʻz qoʻllariga olib bitganlari bunga dalil boʻla oladi. Rossiya mudofaa vaziri va uning oʻrin bosarlari xohlagan vaqtlarida shaxsiy tashrif bilan Qirgʻizistonga kelib, istagan vaqtlarida davlat rasmiylari, hatto prezident bilan uchrashib, oʻzlarining harbiy mustamlakachi ekanlarini oshkor qilib ketishyapti. Mintaqada borayotgan harbiy strotegiya va taktikalarni faqat oʻzlari ishlab chiqib, soʻngra mintaqa yetakchilarini faqat xulosalar bilan tanishtirib oʻtishyapti. Bu harbiy annektsiya (mamlakatni majburiy, bir tomonlama, harbiy quvvat bilan oʻziga qoʻshib olish)ning oʻzginasi boʻlib, Rossiya hozircha Qirgʻizistonni va qisman Tojikistonni bosib boryapti. Uning rasmiy muomalasi ham, munosabati ham xuddi shunga dalolat qilyapti.
Qirgʻiz prezidenti 9 may kundagi bayonotida, Rossiya rasmiylarining va kuch strukturasining bizning migrantlarimizga qilayotgan muomilalaridan norozi ekanini bildirib oʻtdi. Lekin rus mulozimlari bizning prezidentimizni mazxara qilishdan nariga oʻtishmayapti. Chunki ular Qirgʻizistonga oʻta nochor va chorasiz mamlakat sifatida qaray boshlashdi. Xavfsizlik jihatidan qalbaki vahimalar paydo qilib, Qirgʻiziston va Tojikistonni tiz choʻktira olishiga ishonishyapti. Chunki biz ularni ichki ishlarimizga aralashishga shunchalik yoʻl qoʻyib berdikki, ular xohlagan vaqtlarida, xohlagan joylarini portlatib yubora olishadi. Ularni ichki ishlarimizga kirishlariga ruxsat berib yuborgan xavfsizlik tizimlarimiz esa, oʻz xatolarini yashirish maqsadida rus aygʻoqchilari koʻrsatgan tomonni aybdor deb rasmiy bayonot berishga majbur boʻlishadi. Ruslar bizning xavfsizlik tizimimizni shantaj holatida oʻz qoʻllariga olib boʻlishdi.
