Rossiya aviatashuvchi kemasini Suriyaga yubordi
“Interfaks” agentligining oʻz manbasiga tayangan holda xabar qilishicha, Rossiya Shimoliy dengiz floti tarkibidagi “Admiral Kuznetsov” aviatashuvchi kemasini Oʻrta yer dengizining Suriya sohillariga safarbar etdi. Uni bir nechta jangovar qoʻriqchi kemalar kuzatib boradi.
“Admiral Kuznetsov” kreyseri yetakchiligidagi korabllar guruhi uzoq safarga chiqmoqda”,- degan manba.
Manbaning soʻzlariga koʻra, Rossiyaning yagona avianosetsi mamlakat Harbiy dengiz floti (HDF)ning Oʻrta yer dengizidagi doimiy birikmasi tarkibiga borib qoʻshiladi.
Agentlikning qayd etishicha, ushbu safar 4-5 oy davom etadi. “Admiral Kuznetsov”ning bortida eng yangi MiG-29KR va MiG-29KUBR qiruvchi hamda Su-33 samolyotlari bor. Bundan tashqari, kreyser uchun Ka-52K “Katran” jangovar vertolyotlari ham hozirlab qoʻyilgan.
Ayni vaqtda Oʻrta yer dengizida Rossiyaning 10ga yaqin kemasi mavjud.
Avvalroq, harbiy ekspert, isteʼfodagi general-polkovnik Leonid Ivashov “Interfaks”ga bergan intervьyusida, Rossiya oʻzining yangi tarixida birinchi marta kemadagi aviatsiyasidan mashgʻulotlarda emas, jangovar holatda foydalanishini aytgan edi.
