بِسْمِ اللهِ الرَّحْمٰنِ الرَّحِيمِ
Hadisi Sharif bilan
Qizlarga g‘amxo‘rlik qilish
Aziz muxlislar, «Hadisi Sharif bilan” nomli ruknimizning yangi sonini samimiy salomlar bilan boshlaymiz. Sizlarga Alloh Taoloning salomi, rahmati va barakoti bo‘lsin.
Ibn Hajar al-Asqaloniy “Fathul-Bariy – sharhu Sahihul Buxoriy” asarida shunday deydi:
عن عائشة رضي الله عنها، قالت: “دخلتْ امرأةٌ معها ابنتانِ لها تسأَل، فلم تجدْ عندي شيئًا غيرَ تمرةٍ، فأَعطيتُهَا إيَّاها، فَقَسَمَتْهَا بينَ ابنتيْها ولم تأكُلْ منها، ثم قامتْ فخرجتْ، فدخلَ النبيُّ، صلى الله عليه وسلم، علينا فأخبرته، فقال: “من ابْتُلِي من هذهِ البناتِ بشيٍء كُنَّ لهُ سِترًا من النار” رواه البخاري
Oisha roziyallohu anho rivoyat qilib aytdilar: “Bir ayol ikki qizi bilan tilanchilik qilib keldi. Lekin men unga beradigan bitta xurmodan boshqa hech narsa topolmadim. Shuni bo‘lsa ham unga berdim. U xurmoni ikki qiziga bo‘lib berib, o‘zi yemadi. Keyin ayol o‘rnidan turib chiqib ketdi. So‘ng Rasululloh sollallohu alayhi vasallam keldilar. Men unga bo‘lgan voqeani aytib berdim. Rasululloh sallallohu alayhi va sallam: Kimki bu qizlar bilan sinalsa, qizlar ularga jahannamdan to‘suvchi qalqon bo‘ladi”, dedilar. (Buxoriy rivoyati). Rivoyatchi ularning ismini aytmadi.
Ma’mar o‘z rivoyatida hadisdagi: “Lekin men unga beradigan bitta xurmodan boshqa hech narsa topolmadim. Shuni bo‘lsa ham unga berdim” degan so‘ziga “Avvaliga faqat bitta xurmo topib berdi. So‘ng ikkita xurmo topib berdi”, deya qo‘shimcha qiladi.
“Kimki bu qizlar bilan sinalsa”, iborasi bo‘yicha “Qizlarning o‘zlari sababli sinalishmi yoki ularning xatti-harakatlari sababli sinalishmi?”, bu haqida qarama-qarshi fikrlar mavjud.
Sinovning ma’nosi qizlarga kim qanday munosabatda bo‘lishi, ya’ni ularga yaxshi yoki yomon munosabatda bo‘lish bilan bog‘liq. Navaviy rahimahulloh ko‘pincha odamlar qizlarga past nazar bilan qarashlari uchun “Sinov” so‘zi ishlatilganligini aytadi. Shariat ularni bundan qaytarish uchun keldi va qizlarni avaylab, ularga sabr bilan yaxshilik qilganlarga va’da qilingan ajrni eslatib, ularni o‘ldirishdan ogohlantirdi.
“Ularga jahannamdan to‘suvchi qalqon bo‘ladi”, degani – parda bo‘ladi degan ma’noda kelgan.
Aziz birodarlar!
Qizlar ko‘pincha erkaklardan farqli o‘laroq o‘z ehtiyojlarini qondirishdan zaif bo‘lganligi uchun bu hadis ularga g‘amxo‘rlik qilish kerakligini tasdiqlaydi. Erkaklar esa jismonan kuchliroq bo‘ladi va ko‘pincha muammolarni tezda hal qila oladilar.
Islom ayollarni himoya qilishga va hayotning barcha jabhalarida ularga g‘amxo‘rlik qilishga buyuradi. Islom ayolga g‘amxo‘rlik qilib, uni himoya qilishni va barcha zaruriy narsalar bilan ta’minlashni, oila rishtalarini saqlab, ularni hurmat qilishni buyuradi. Ayol – bu sizning qizingiz, opa-singlingiz, onangiz, buvingiz, jufti-halolingiz, xolangiz va ammangizdir…
Bunday ulug‘ ne’mat uchun Allohga hamdu-sanolar aytamiz.
Aziz birodarlar, navbatdagi «Hadisi Sharif bilan» nomli ruknimizgacha Alloh Taoloning panohida bo‘ling. Sizlarga Alloh Taoloning salomi, rahmati va barakoti bo‘lsin.
3 Robius Sani, 1446h yil.
6 oktyabr, 2024m yil.
