بِسْمِ اللهِ الرَّحْمٰنِ الرَّحِيمِ
Bosqinchi uddalay olmagan ishni maʼmuriyat oxiriga yetkazyapti
Falastin axborot agentligi Vafaning (hijriy 1444 yil 30 zulhijja, milodiy 2023 yil 18 iyul seshanba kuni) nashr qilgan xabarida bunday deyiladi:
«Falastin ichki ishlar vaziri general-mayor Ziyod Hab Rihning taʼkidlashicha, vazirlik va xavfsizlik idoralari qonun va tartibni tatbiq qilishda aslo eʼtiborsizlik qilmaydi. Vazirga koʼra, bu narsa xalqning ozodlik va mustaqillikka boʼlgan intilishini roʼyobga chiqarishga qaratilgan siyosiy va milliy oʼzgarmas asoslarni saqlash hamda xalqning milliy loyiha va uzoq yillik yutuqlarini asrab-avaylash majburiyatidan kelib chiqmoqda».
Ichki ishlar vaziriligining seshanba kuni eʼlon qilingan bayonotida aytilishicha, general-mayor Hab Rih oʼz bayonotini Janin, Tubos, Nablus, Qilqiliya, Tulkarm va Silfit viloyatlari hokimiyatlarida oʼtkazgan tekshiruv safari chogʼida, hokimlar, xavfsizlik xizmati rahbarlari va kotiblar bilan uchrashgan paytda aytgan. Uning bu uchrashuvlaridan koʼzlangan maqsad, xavfsizlik kuchlari xodimlari Falastin jamiyatida fuqarolik tinchlik tizimini mustahkamlashdan hamda xavfsizlik va tinchlikni taʼminlashdan iborat oʼz rollarini bajarishlari uchun ularni qoʼllab-quvvatlashdir. Shuningdek, ayni viloyatlardagi xavfsizlik ishlarining mohiyatini hamda ularning rivojlanish ehtiyojlarini koʼrib chiqish ham koʼzlangan. Bundan tashqari, General-mayor Hab Rih turli faollar bilan uchrashuvi chogʼida Falastin prezidenti va rahbariyatining koʼrsatmalarini urgʼulab oʼtgan. Bu koʼrsatmalar Falastin milliy loyihasining yutuqlarini saqlab qolishdan hamda davlat muassasalarini barpo etish va himoya qilishni yakunlashga oid hukumatning saʼy-harakatlariga putur yetkazishga qaratilgan har qanday urinishlarni oldini olishdan iborat».
Ushbu xabarga nisbatan Hizb ut-Tahrir – muborak Falastin zamini matbuot boʼlimi oʼzining saytlarida quyidagi mazmunda izoh nashr qildi:
«Yahudiy bosqinchi armiyasining yaqinda Janin qochqinlar lagerida oʼtkazgan operatsiyasi ortidan yahudiy vujudi bilan Falastin maʼmuriyati oʼrtasida kelishuv boʼlganligi haqida koʼp xabar va yangiliklar tarqaldi. Tomonlar yahudiy vujudi tomonidan Gʼarbiy sohil mintaqalari, xususan, Janin va Nablusda olib borilayotgan harbiy operatsiyalarning toʼxtatilishiga kelishganlar. Bundan, albatta, Falastin maʼmuriyatining qarshilikni tugatish, mujohidlarni taʼqib qilish va uy-joy qurayotgan yahudiylar xavfsizligini taʼminlashdan iborat oʼz rolini oʼynashiga imkon berish koʼzlangan… Maʼmuriyatning bunday rasvo rolni bajarishi uchun keltiradigan bahonalariga kelsak, bular avvaldan maʼlum boʼlib, ular xavfsizlikni oʼrnatish, qonunni kuchaytirish, aholi tinchligini saqlash hamda yahudiylar halovatini buzgan har bir kishini bostirish uchun soxta davlatcha qurilish ishini yakunlashdan iborat. Bularning barchasini oqlash uchun yolgʼon hujjat va dalillar oʼylab topishi kerak boʼladi, oʼylab topdi ham. Masalan, soʼnggi voqealar paytida Janindagi politsiya uchastkasining yoqib yuborilish hodisasi yoki baʼzi mujohidlarni – ularga zugʼum oʼtkazish uchun – xavfsizlik xizmati xodimlariga qarata oʼq uzishga undashi kabi. Аgar maʼmuriyat mujohidlarni bunday nopok qilmishni sodir etishga unday olmasa, oʼzining josuslari qoʼli bilan sodir etishi ham mumkin. Shu orqali eski siyosatini qoʼllamoqchi. Uning eski siyosati qonunga amal qilish va tartibsizlikni oldini olish, degan bahonalar bilan xalq qoʼlidagi barcha qurol-yarogʼni yigʼishtirib olib, ularni koʼchmanchi yahudiylar va ularning tanklari qarshisiga qup-quruq qoʼllari yoki toshlar bilan kurashishga majbur qilishdan iborat…».
Matbuot izohida yana bunday deyildi:
«Falastin maʼmuriyati oʼzi paydo boʼlgan kundan boshlab bosqinchi yahudiy vujudining richagi boʼlib kelmoqda. Soʼnggi yillarda yanada kuchayib, yahudiy vujudi xavfsizligini taʼminlash uchun Falastin ahli va mujohidlarga qarshi kurashda uning eng kuchli, eng tez va eng qirgʼinbarot richagiga aylandi. Yahudiylar ikki davlat yechimidan voz chekkanlaridan keyin bu maʼmuriyatni mahkam saqlab qolishlariga faqat shu narsa sababchi boʼldi. Shuning uchun ham Falastin rejimining agʼdarilmasligiga va uning xavfsizlik xizmati saqlanib qolishiga zoʼr berib harakat qilishyapti va buni hech kimdan yashirishmayapti».
Izoh soʼnggida quyidagilar taʼkidlandi:
«Haqiqatda, Falastin ahlining buyuk musibati mana shu maʼmuriyat va islomiy yurtlar hukmdorlari boʼlib qoldi. Bu musibatga chek qoʼyish va bosqinchi vujudni ildizi bilan qoʼporib tashlashning yagona yoʼli esa, Ummat va uning qoʼshinlarining harakatga kelib, Аqso masjidi sahnida takbirlar aytishidir».
Roya gazetasining 2023 yil 26 iyul chorshanba kungi 453-sonidan
