بِسْمِ اللهِ الرَّحْمٰنِ الرَّحِيمِ
Hozirgi xalqaro vaziyat Chechenistonning Rossiyaga tobelikdan qutulmog‘i uchun qulay vaziyatdir
Doktor Faraj Mamduh
Barcha davlatlar va tirik xalqlar mustamlakachidan ozod bo‘lishni istaydi. Ammo mustamlakachini haydab chiqarib, o‘rniga – xuddi bugunda musulmon yurtlaridagi holat kabi – uning istagi bo‘yicha harakat qiladigan hukmdorni olib kelish bilan mustaqillik amalga oshmaydi. Balki suverenlik va hokimiyat yurt ahlining qo‘lida bo‘lsagina mustaqillik bo‘ladi.
Mustaqillikning xalq va millatlar to‘lashlari kerak bo‘lgan badali mavjud va bu qimmatga tushadi. Biroq, ushbu badal mustaqillik olib keladigan katta yutuq va yirik daromadlar bilan o‘lchanmaydi. Chunki tobelik bilan mustaqillik o‘rtasidagi farq misoli qul bilan xo‘jayin o‘rtasidagi, xor bilan aziz o‘rtasidagi farqdir. Zero, qul ozod bo‘lish uchun har qancha katta badal to‘lamasin, baribir xo‘jayinlar, hurlar va azizlar zamoniga qaraganda, bu arzimas kichik badal bo‘lib qolaveradi.
Darhaqiqat, Islom Ummati boshqa ummatlarga tobe bo‘lib yashashi shar’an haromdir. To‘g‘ri, Islom Ummati har sohada birinchi o‘rinni egallamog‘i lozim. Ammo shu bilan birga, uning zimmasiga Allohning dini va Rosulining risolati ham omonat yuklangan… Bas, shunday ekan, qanday qilib u boshqa xalqlar va ummatlarga tobe bo‘lyapti?! Qanday qilib mustamlakachi kofir G‘arbga tiz cho‘kib itoat qilishga rozi bo‘lyapti?! Axir, Alloh Taolo
وَلَن يَجْعَلَ اللَّهُ لِلْكَافِرِينَ عَلَى الْمُؤْمِنِينَ سَبِيلاً
«Alloh hargiz kofirlar uchun mo‘minlar ustiga yo‘l bermagay» [Niso 141]
deb aytmaganmi?!
Haqiqiy mustaqillikka erishish uchun harbiy jihatdan ozod bo‘lish bilan bir qatorda, fikriy va siyosiy jihatdan ham ozod bo‘lish darkor. Zero, qullik mentalitetiga o‘rganib qolgan xalqlar mustaqil bo‘lolmaydi. Shuning uchun xalqlarni itoatgo‘ylik va tobelikka tushirib yuborgan fikrlarni o‘zgartirib, ularni o‘rniga mustaqillik, ozodlik va suverenlikka ko‘taradigan fikrlarni berish kerak. Busiz har qancha urinishlar behuda va befoyda bo‘lib, qilingan barcha sa’y-harakat va energiyalar zoye ketadi. Quyidagi kalomni aytgan Alloh Taolo haq so‘zlagan:
إِنَّ اللهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ
«Aniqki, to biron qavm o‘zlarini o‘zgartirmagunlaricha Alloh ularning ahvolini o‘zgartirmas» [Ra’d 11]
Aynan fikrlar, tushunchalar va ishonch-qanoatlar xo‘jayinni qulga, qulni xo‘jayinga aylantiradi. Bunga voqeligimizda misollar juda ko‘p. Ulardan biriga Chechenistonni misol qilamiz. Chechenlar Allohning dushmani bo‘lgan Rossiyaga qarshi jihod va qarshilik bayrog‘ini ko‘tarib chiqdilar. Javhar Dudayev va Shamil Basayev singani mard mujohidlar Rossiyadan mustaqil bo‘lish uchun qahramonlik va haqiqiy harakatning eng yaxshi namunasini ko‘rsatdilar. Darhaqiqat, chechenlar (Alloh rahmat qilsin) Javhar Dudayev yetakchiligida Rossiyadan mustaqil bo‘lishga muvaffaq bo‘lishdi va uni o‘sha paytdagi tinchlik shartnomasiga xorlarcha imzo chekishga majbur qilishdi. Bu holat Qodirov va uning o‘g‘li Ramzan hokimiyatga kelgunga qadar davom etdi. Bu ikkalasi Rossiya irodasiga bog‘liq bo‘lmagan, mustaqil, ozod va o‘jar chechenlarni kofir Putin rejimi istagan tarafga o‘ynatadigan shaxmat doskasidagi piyodalarga aylantirib qo‘ydi.
Ha, Checheniston o‘z mustaqilligini yo‘qotib, yana Rossiya bag‘riga qaytdi. Avval o‘jar raqib va mag‘rur dushman bo‘lgan bo‘lsa, hozirga kelib, dushmaniga qarshi otadigan Rossiyaning nayzasiga aylanib qoldi. Ahvol shu darajaga yetdiki, Chechenistonning hozirgi prezidenti Ramzan Putinning musulmon o‘g‘li, deb atalmoqda. Xo‘sh, o‘zgargan narsa nima o‘zi?! Odamlar o‘zgardimi yoki ularning fikrlari, tushunchalari va ishonchlari o‘zgardimi?! Qayta mustaqil bo‘lib, Rossiyaning tomog‘iga suyak bo‘lib tiqilishlari uchun ularga nima yetishmayapti?! Shubhasiz, aynan Qodirov va O‘g‘li Ramzanning chechen xalqiga singdirgan yangi tushunchalari chechenlarni Rossiyaga batamom tobega aylanishlariga sabab bo‘ldi.
Chechenlar bilan afg‘onlar o‘rtasidagi o‘xshashlikni misol sifatida aytadigan bo‘lsak, bu xalqlarning ikkalasi ham Alloh yo‘lida jihod qilishni sevadi. Tarixlari qahramonlik va mardliklarga to‘la bu ikki xalq asrlar davomida kofirlarni turli yo‘qotish va mag‘lubiyatlarga uchratib kelgan. Biroq, bugungi kunda afg‘onlar Amerikani katta yo‘qotishlarga uchratib, qochib chiqishga majbur qilishgan bo‘lsa, bu yoqda Qodirov bilan o‘g‘li Ramzan Putin ko‘magida hokimiyatni egallashdi va chechenlar o‘z mustaqilligini yo‘qotdi. Mana, chechen askarlari Rossiya manfaati uchun ukrainlarga qarshi kurashib, Rossiyaning shon-sharafi uchun Ukrainada o‘ldirilmoqda!
Rossiya bugungi kunda Ukrainada qattiq azob chekmoqda. U qorong‘i tunnelga kirib qolgan bo‘lib, uning oxirida yorug‘lik deyarli ko‘rinmayapti. Uni mag‘lub etish hamda energiya va resurslarini quritish uchun butun G‘arb unga qarshi to‘plangan. Mana shunday bir vaziyatda xoin Ramzanga qarshi inqilob qilib, Ukrainadan chiqib olishdan hamda Rossiyani battar krizisga tiqib, burnini yerga ishqashdan chechenlarni nima to‘syapti?! Mard-qahramon chechenlar qayta o‘z mustaqilliklarini tiklash uchun Rossiyaga qarshi front ochsalar bo‘lmaydimi?! Nusrat uchun va Rossiyadan mustaqillikka erishish uchun qilingan jang Ukrainada Rossiya shon-shavkati uchun qilingan jangdan yaxshi emasmi?! Qahramon chechenlar uchun hozirgi qulay vaziyatni g‘animat bilib, Rossiya boshdan kechirayotgan og‘ir ahvoldan o‘z mustaqilligini qayta tiklash yo‘lida foydalanish vaqti kelmadimi?!
Roya gazetasining 2023 yil 5 aprel chorshanba kungi 437-sonidan
