بِسْمِ اللهِ الرَّحْمٰنِ الرَّحِيمِ
Bu mag‘lublik va tobelikda o‘tkazayotganimiz Ramazonlarning oxirgisi bo‘lsin
Ustoz As’ad Mansur
Mana, Xalifalik va xalifasiz yashagan hamda mustamlakachi davlatlarga mag‘lublik va tobelik ostida o‘tgan bir yuz ikki yil ortidan yana Ramazon oyi kirib keldi. Xo‘sh, insonlar uchun chiqarilgan eng yaxshi Ummatga nima bo‘ldi?! Shu darajada soni ozayib yoki zaiflashdimiki, ilmoniylik va demokratiya to‘nini kiygan oddiy bir yangi salibchilik hujumini ham o‘zidan daf qilolmay qolsa?! Nahotki, dushmanni qaytarishga, yovuz kuchlarni tumshug‘ini tuprog‘ga ishqab qo‘yishga, tajovuzkorlarni mag‘lub qilib, islomiy yurtlarni salibchi kapitalizm axlatlaridan tozalashga qodir bo‘lolmasa?! Uning davlatini ag‘dargan, birligini parchalagan, farzandlarini qirg‘in qilib, boyliklarini talagan dushmaniga shu qadar mag‘lub va tobe bo‘lib qolishining sababi nimada?!
Ummat shunday og‘ir bir musibatga uchrab, bu musibatni barcha his qilayotgan, ammo davosini bilolmayotgan bir paytda, o‘tkir tafakkur qobiliyatiga ega bo‘lgan har bir inson Ummatning qoloqligi sababini qidira boshlaydi hamda uning tarixi va meroslari haqida izlanib, Ummat avval qanday bo‘lganu, hozir qanday ahvolga tushib qolganini o‘rganadi. Uning yirik davlat, buyuk hazorat, chuqur saqofat va yorqin mafkuraga ega buyuk Ummat bo‘lganini, 1300 yil davomida uch qit’ada hukmronlik qilganini ko‘rib, Ummatning uyg‘onish sirini, qoqilishi va yiqilishi sabablarini qidiradi. Va nihoyat uning mabdasiga yetib keladi. Shunda Ummat fikratini xiralik chulg‘aganini, parda to‘sib qolganini aniqlaydi va uni tozalab, tiniqlashtirib, avvalgi musaffo holiga qaytaradi. Ummat tariqatini ham izlab, uni to‘g‘ri va sog‘lom holatda topadi hamda fikrat bilan tariqatni bir-biriga hech ajralmaydigan tarzda mustahkam bog‘lashning naqadar ahamiyatli ekanini anglab yetadi. Ana shunda mabdaiy hizbiy uyushma shakllanadi. U o‘sib, rivojlanib, kengayib, axiri mukammal ozodlik harakatiga aylanadi. Mana, bu uyushma Allohning izni ila Payg‘ambarlik minhoji asosidagi Xalifalikka da’vat qilayotgan va hech kimdan yashirinmagan uyushmadir. Kimda-kim Allohga rostgo‘y va xolis bo‘lib, Islom Ummatini qutqarishni xohlasa, bas, ushbu uyushmaga yetib olmog‘i, unga qo‘shilmog‘i va uni qo‘llab-quvvatlamog‘i darkor. Toki, bo‘ynida sustkashlik va bay’atsiz o‘tish gunohi bo‘lmasin hamda johiliyat o‘limini topmasin.
شَهرُ رَمَضَانَ الَّذِى أُنزِلَ فِيهِ القُرآنُ هُدًى لِّلنَّاسِ وَبَيِّناتٍ مِّنَ الهُدَى وَالفُرقَانِ فَمَن شَهِدَ مِنكُمُ الشَّهرَ فَليَـصُمهُ
«(U sanoqli kunlar) Ramazon oyidirki, bu oyda odamlar uchun hidoyat bo‘lib va hidoyat va furqon (haq bilan botilni ajratguvchi)ning ochiq oyatlari bo‘lib Qur’on nozil qilingan. Bas, sizlardan kim bu oyga hozir bo‘lsa, ro‘za tutsin» [Baqara 185]
Alloh Ramazonda Qur’onni nozil qilish bilan bu oyni barakotli oy qildi. Go‘yo insonlarni hidoyat qiluvchi Qur’onni nozil qilgani sababli Alloh Taologa shukr qilishimiz uchun ramazon ro‘zasi farz qilingandek. Shuning uchun Qur’onga imon keltirgan har bir shaxs odamlarni zalolatdan qutqarib, Allohning izni ila, ularni zulmatlardan nurga chiqarish uchun Qur’onni barcha insonlarga yetkazmog‘i darkor. Shu bois, faqat ro‘za tutish bilan kifoyalanib, Qur’onni odamlarga yetkazmaslik hamda uni xuddi Rosululloh ﷺga nozil qilingan tarzda tatbiq qilishga da’vat qilmaslik joiz bo‘lmaydi. Darhaqiqat, ul zot Qur’onni barcha odamlarga yetkazdilar, Qur’on davlatini barpo etib, uning haq ila botilni ajratib beruvchi ahkomlarini tatbiq etdilar. U zotning bu amallari butun insoniyatga o‘rnak bo‘lib qoldi. Shunday ekan, inson qanday qilib, o‘zining ustidan Qur’ondan bo‘lmagan ahkomlarning tatbiq etilishini va Qur’ondan bo‘lmagan qonunlarning ishlab chiqilishini qabul qilishi mumkin?! Qanday qilib, xalq suverenligi-xo‘jayinligi to‘g‘risidagi illyuziyaga rozi bo‘lishi va xuddi ro‘za, namoz, zakot va haj kabi farz bo‘lgan shariat suverenligini rad etishi mumkin?!
Ramazon jihodlar, fathlar va nusratlar oyidir va uni shunday oyga aylantiraylik. Go‘yo Alloh Subhanahu va Taolo musulmonlarning ilk jangi ro‘zada bo‘lishini xohlab, hijratning ikkinchi yilida ham ro‘zani, ham buyuk Badr jangini farz qilgandek. Toki, musulmonlar ro‘za bilan jihodning bir-biridan ajralmasligiga diqqat qaratsinlar. Zero, ro‘za yemoq va ichmoqdan saqlanishgina emas. Balki ro‘zani katta ibodat, ya’ni Allohning yo‘lidagi jihod bilan qo‘shish lozim. Haqiqatda, musulmonlar buni tushunib, Ramazonda jihoddan hamda buyuk fath va nusratlar quchishdan to‘xtamadilar. Ramazonda Badr jangi, Makka fathi, Qodisiya jangi, Andalus fathi, Zaloqa, Ayn-Jolut, Hittin janglari bo‘lib o‘tdi. Baytul Maqdisning ozod etilishi, Umuriya fathi va Anqara fathi ham Ramazonda bo‘lgan. Bas, bu oy uxlash, iftorlikka va saharliklarga ovqat tayyorlash, serial va filmlar tomosha qilish oyi emas. Balki u kunduzlari ro‘za tutib, jihod qilish, kechalari qiyomda bo‘lib, Qur’on o‘qish oyidir.
Qur’on, sahih hadislar, Rosululloh ﷺning siyratlari va sahobalar ijmosi, bular Islom Ummatidan boshqa biron bir ummatda mavjud bo‘lmagan shar’iy manbalar bo‘lib, ularda kelgan qat’iy shar’iy buyruqlar, shu bilan bir qatorda Ummatning ko‘hna tarixidagi haqiqatlar, bularning barchasi Xalifalikni barpo etib, Islomni tatbiq qilish uchun harakat qilish vojibligini bayon qiladi. Mabdaning mohiyati ham mabda sohibiga uni ichida saqlab turmaslikni, balki barcha oqim va fikrlarga qarshi kurashishni buyuradi. Shuningdek, boshqa mabda va tuzumlarning hukmron bo‘lishiga yo‘l qo‘ymaslikni, boshqa tuzumni tatbiq qilmaslikni va boshqa manbadan kelib chiqqan qonunlarga bo‘ysunmaslikni farz qiladi.
فَلَا وَرَبِّكَ لَا يُؤمِنُونَ حَتَّى يُحَكِّمُوكَ فِيمَا شَجَرَ بَينَهُم
«Yo‘q, Parvardigoringizga qasamki, to ular o‘z o‘rtalarida chiqqan kelishmovchiliklarda sizni hakam qilmagunlaricha zinhor mo‘min bo‘la olmaydilar» [Niso 65]
Musulmonlarning hozirgi voqeligi ulardan Xalifalikni barpo etishga harakat qilishni talab qilmoqda. Chunki Xalifaliksiz na qutulish bor va na rivojlanish. Musulmonlarning voqeligi, shuningdek, har bir sog‘lom qalb egasi bo‘lgan va o‘zi hozir bo‘lgan holda chin ko‘ngildan quloq soladigan kishiga Ummatni qutqarish uchun harakatga kelishni eslatmoqda. Bundan boshqa yo‘l yo‘q. shu bois, zolim kapitalizmdan kuyib jizg‘inak bo‘layotgan barcha insoniyatni qutqarish uchun harakat qilish musulmonlarga farzdir. Chunki Ummat butun olamni kufr, zulm, zalolat, odamlarning bir-birlarini qul qilishi, mulk erkinligi niqobi ostida birovning molini nohaq yeyish, shaxs erkinligi, demokratiya va inson huquqlari niqobi ostida odamlarni razolat botqog‘iga botirish kabi barcha iflosliklardan qutqarish omonatini o‘z yelkasiga olgan
وَكَذلِكَ جَعَلناكُم أُمَّةً وَّسَطاً لِّتَکُونُوا شُهَدَاءَ عَلَى النَّاسِ
«Shuningdek, sizlarni boshqa odamlar ustida guvoh bo‘lishingiz uchun o‘rta (eng yaxshi) Ummat qildik» [Baqara 143]
Ramazon oyi iymon muhiti bilan burkangan. Shuning uchun unda taqvo va ruhiy rishtalar hukmronlik qilib, musulmonning Parvardigori bilan bo‘lgan aloqasini mustahkamlaydi.. Zero, ro‘zadan hikmat ham shu:
كُتِبَ عَلَيکُمُ الصِّيَامُ کَمَا كُتِبَ عَلَى الَّذِينَ مِن قَبلِکُم لَعَلَّكُم تَتَّقُونَ
«Taqvoli kishilar bo‘lishingiz uchun sizlardan ilgari o‘tganlarga farz qilingani kabi sizlarga ham ro‘za tutish farz qilindi» [Baqara 183]
Bu muhit musulmonni solih amallarni qilishga undaydi hamda ishni birlamchilardan boshlashga chaqiradi. Zero, Xalifalikni barpo etish birinchi ustuvor vazifalardan biridir. Chunki ahkomlarning tatbiq etilishi Xalifalikka bog‘liq bo‘lib, u bilan barcha vojibotlar qoim bo‘ladi, mol, nomus va yurt himoyasi ham Xalifalik tomonidan ta’minlanadi. Biz musulmonlarga birinchi darajali ustuvor vazifalarni hech malollanmay, erinmay eslatmog‘imiz darkor. Darhaqiqat, yaxshilik qilishni, boshqalardan javobgar bo‘lishni, muhtojga yordam berib, g‘oyalarga yetishish yo‘lida jon fido etishni yaxshi ko‘rish musulmonlarning tabiatiga muhrlab qo‘yilgan. Agar ularning boshqaruvini xolis ongli yetakchilik qo‘lga olsa, musulmonlar mo‘jizalar yaratishni boshlaydilar.
Islom Ummati toza, saxovatli xalqdir. U har qancha ochlik, azob-uqubat va zo‘ravonlikka duchor bo‘lsa ham, qayta oyoqqa turib, arslon kabi o‘kiradi va to‘fonga aylanadi. Masalan, salibchilar va mo‘g‘ullar davrida uning boshiga ne-ne musibatlar tushmadi. Ammo yana oyoqqa turib, qayta buyuk davlatga aylandi. Hozir ham boshiga qancha musibatlar tushgan bo‘lsa ham o‘lgani yo‘q. Zero, u jang maydonlarida yirik davlatlarni mag‘lub qildi. Bugun esa malay rejimlarga qarshi qilgan qo‘zg‘oloni orqali Amerika va G‘arb davlatlarini deyarli ag‘dardi. Darhaqiqat, uning ongi o‘sdi, hali mukammal onga ega bo‘lmagan esa-da, ammo albatta ega bo‘ladi. Chunki u insonlar uchun chiqarilgan eng yaxshi Ummatdir. Chunki u eng to‘g‘ri mabda sohibi bo‘lgan va eng ongli Hizbni yetishtirib chiqargan Ummatdir. U Allohning izni ila albatta nusrat quchadi.
Roya gazetasining 2023 yil 22 mart chorshanba kungi 435-sonidan
