Ukrainaning anneksiya qilingan hududlarini Rossiyaga qoʼshib olish boʼyicha kelishuvlar imzolanadi
Xabar: 30 sentyab kuni Kremlda Rossiya tarkibiga yangi hududlarni qoʼshish boʼyicha kelishuvlarni imzolash marosimi boʼlib oʼtadi. Bu haqda RF prezidenti matbuoti kotibi Dmitriy Peskov maʼlum qildi. Rossiya parlamentining ikki palatasida ham Ukraina hududlarini anneksiya qilish boʼyicha ovoz berish jarayoni faqat keyingi haftada oʼtkazilishi kutilmoqda. Shundan keyingina Putin bu qoʼshilishni Rossiya Konstitutsiyasida mustahkamlab qoʼyishi mumkin.
“Ertaga Georgievskiy zalida soat 15:00 da Rossiya Federatsiyasiga yangi hududlarni qoʼshib olish boʼyicha kelishuvlarni imzolash marosimi boʼlib oʼtadi. Putin katta chiqish qiladi”, – degan Peskov.
Uning soʼzlariga koʼra, Rossiya prezidentining bu nutqi Federal majlisga murojaat boʼlmaydi, bu keyinroq oʼtkaziladi.
Peskov prezident “DXR” va “LXR” rahbarlari, shuningdek Xerson va Zaporijjya oblastlarining Rossiya tomonidan tayinlangan rahbarlari bilan “marosim maydonida” gaplashishini qoʼshimcha qilgan.
Izoh: Rossiyaning Ukrainaga qarshi boshlagan “maxsus amaliyoti” Putin kutgan natijani bermadi. Putin orzu qilgan tezkor gʼalaba va mahalliy aholini rus qoʼshinlarini gullar bilan kutib olishi quruq hayoldan boʼlib chiqdi. Rossiyaning harbiy quvvati shishirilgan shardan boshqa narsa emasligi, Putin oligarxlari xalq boyliklariga ega chiqib, talon-taroj qilgani kabi, yuqori martabali rus zobitlari ham harbiy byudjet uchun ajratilgan millardlab dollarni yeb yuborgani, rus harbiy quvvatidan asar ham qolmaganini fosh etib qoʼydi. Ukraina urushi choʼzilib borgani sari rus armiyasi holdan toyib, harbiy texnika va harbiylar yetishmovchiligiga duch kela boshladi. Shu sababli 21-sentyabrda Putin cheklangan mobilizatsiya eʼlon qildi. Bu rus armiyasi Ukrainada magʼlubiyatga uchrayotganini anglatadi.
Putinning bu urushda gʼalaba qozonishi yoki hech boʼlmaganda magʼlibiyatini yashirish uchun rus xalqining vatanparvarlik tuygʼularini qoʼzgʼotishi, Ukraninani goʼyoki bosqinchi davlat sifatida koʼrsatishga erishishi kerak. Shu sababli ham Rossiya shoshilinch tarzda bosib olingan hududlarda Rossiya tarkibiga qoʼshilish boʼyicha referendumlar oʼtkazdi. Ushbu referendumlarda aholining aksari Rossiya tarkibiga “qoʼshilishni yoqlab ovoz berdi”. Ertaga Putin “DXR” va “LXR”ni rasman Rossiya tarkibiga qoʼshilganini eʼlon qilsa, endi goʼyoki Ukraina armiyasi Rossiya hududlarini bosib olish uchun urush olib borayotgan, Rossiya esa “vatan yahlitligi uchun” jang qilayotgandek boʼlib qoladi. Bu esa yaqin kelajakda Putinga ommaviy mobilizatsiya eʼlon qilish imkonini beradi.
Bundan tashqari, KXShT shartnomasining 4-moddasida belgilangan “aʼzolaridan birining xavfsizligi, barqarorligi, hududiy yaxlitligi va suverenitetiga tahdid soladigan qurolli hujum barcha aʼzo davlatlarga nisbatan tajovuz sifatida qabul qilinadi” degan asos bilan Rossiya oʼz hududiga Ukraina tomonidan “bosqin” boʼlayotganini daʼvo qilib, KXShTga aʼzo davlatlarni ham bu urushga tortishi uchun yoʼl ochiladi.
Аbdurahmon Odilov
