بِسْمِ اللهِ الرَّحْمٰنِ الرَّحِيمِ
Hizb ut-Tahrir – muborak Falastin zamini delegatsiyasi Аdvokatlar Аssotsiatsiyasi yigʼilishida qatnashib, rejim zoʼravonligiga qarshi turishga chaqirdi
2022 yil 19 iyul seshanba kuni Hizb ut-Tahrir – muborak Falastin zamini delegatsiyasi Аdvokatlar Аssotsiatsiyasi yigʼilishida ishtirok etdi. Falastin maʼmuriyati tomonidan qonunlar va sud tizimiga yaqinda kiritilgan tuzatishlarga qarshi turish maqsadida assotsiatsiyaning Ramallohdagi qarorgohida oʼtkazilgan ushbu yigʼinga siyosiy kuchlar va partiyalar chaqirildi. Maʼlumki, kiritilgan bu tuzatishlar haq-huquqlarning zoe ketishiga olib kelib, maʼmuriyatning nufuzli kishilar va pul kitlari manfaati yoʼlida odamlar ustidan zoʼravonlik qilishiga imkon beradi.
Delegatsiya tarkibida Hizb ut-Tahrir – muborak Falastin zamini matbuot boʼlimi aʼzolari muhandis Bohir Solih bilan ustoz Yusuf Аbu Zar ishtirok etdi.
Muhandis Bohir Solih yigʼinda soʼzga chiqib, quyidagilarni taʼkidladi:
«Falastin maʼmuriyati korruptsiyaga botgan boʼlib, uning xavfsizlik, siyosiy va ijroiy organlari odamlarga zoʼravonlik qilishdan, halol tijorat qilayotgan insonlarga tazyiq oʼtkazib, sudxoʼrlikka majburlashdan boshqa narsani bilmaydi. Qonunlarga kiritilgan tuzatishlar, masalan, hibsga olish, ayblanuvchining chaqiruvga kelmaslik holati va boshqa tuzatishlar rejimning odamlar ustidan xavfsizlik bosimini yanada kuchaytirishiga va avvalgidan ham zolimroq boʼlishiga xizmat qiladi. Shuning uchun jamiyatning har bir qatlami Falastin rejimining bunday zulmu zoʼravonligiga qarshi chiqib, unga chek qoʼyishi lozim. Bu esa, qoʼmitalar olib borgan dialoglar orqali aslo amalga oshmaydi. Chunki bu dialoglar qaerdan boshlangan boʼlsa oʼsha joyda tugaydi va boʼsh doira ichida aylanadi. Qoʼmita aʼzolarining aksari hukumat vakillaridan yoki hukumat koʼrsatgan nomzodlardan iborat. Bundan tashqari, qoʼmita foydasiz qarorlarni chiqarib, adolatsiz qarorlarni qonuniylashtiradi. Shu bois, bunday zulmu zoʼravonlikka chek qoʼyish uchun bevosita Falastin rejimiga, uning zoʼravonligiga, insonlar va siyosiy kuchlarning huquqini poymol etishiga qarshi turish kerak boʼladi. Buning uchun esa, xalq koʼtarilishi va bularga chek qoʼyish talabi bilan rejimga qarata hayqirishi lozim. Xalq shunday qilmasa, rejim yana donor davlatlar talabini qondirishda va ularning maqsadiga xizmat qiluvchi qonunlar chiqarishda davom etaveradi… Odamlarga yana zoʼravonlik qilib, yurtni pul kitlariga va milliy loyiha, deya atalayotgan reja rahnamolariga yem qilib beraveradi…
Bohir Solih maʼmuriyat qonunchiligining yaroqsizligi hamda Falastin maʼmuriyati CEDAW kabi mashʼum konventsiyalarga imzo chekar ekan, unga qarshi chiqqan odamlarni eʼtiborsiz qoldirgani haqida gapirib oʼtdi. Unga koʼra, maʼmuriyat zoʼrovonligini toʼxtatib qolishning yagona yoʼli unga qarshi chiqishdir va bunga odamlarning «ijtimoiy taʼminot» mavzusida erishgan yutugʼi misol boʼla oladi.
Bohir Solih yana quyidagilarni ham taʼkidladi: Hizb ut-Tahrir maʼmuriyat va uning zoʼravonligiga qarshi turishni qoʼllab-quvvatlab, xalq manfaati va ularning haqqoniy masalalarini qabul qiladi. U shuningdek, oʼz faoliyatida hamda maʼmuriyatning jinoyatlari va zoʼrovonligiga qarshi chiqqan har bir kishini qoʼllab-quvvatlashda davom etadi.
Roya gazetasining 2022 yil 27 iyul chorshanba kungi 401-sonidan
