Qozogʼiston va Oʼzbekiston harbiylari Аfgʼoniston chegarasida mashgʼulot oʼtkazishadi
Xabar: Qozogʼiston va Oʼzbekiston harbiylari ishtirokida “Hamkorlik-2021” qoʼshma mashgʼulotlari boʼlib oʼtadi.
Mashgʼulotlar Surxondaryo viloyati Termiz shahridagi poligonda 17 noyabrdan 24 noyabrga qadar boʼlib oʼtadi.
“Qoʼshma mashgʼulotlar maqsadi – vazifalarni birga hal qilish chogʼida ikki qardosh davlat qurolli kuchlarining mosligi va birgalikdagi harakati darajasini oshirish”, – deyilgan Qozogʼiston Mudofaa vazirligi xabarida.
Mashgʼulotlarda yuzdan ziyod harbiy xizmatchilar qatnashadi. Su-30SM qiruvchilari, S-295 harbiy-transport samolyotlari hamda taktik uchuvchisiz uchar qurilmalari jalb qilinadi.
Harbiylar oʼzlarining qidiruv-razvedka ishlarini olib borish mahoratlari namoyish etishadi, dushmanning ilgʼor otryadlarini yoʼq qilishda jangovar qoʼriqlash xatti-harakatlarini yaxshi oʼrganib olishadi.
Bundan tashqari, ular noqonuniy qurolli guruhlarning hujumini qaytarish va ularni yoʼq qilish malakalarini oshirishadi. Jang maydonida yaralanganlar va ishdan chiqqan texnikalarni olib chiqish koʼnikmalarini mustahkamlashadi.
Izoh: АQSh Аfgʼonistondan bosqinchi kuchlarini olib chiqib ketishi ortidan Rossiya va uning yetovidagi Markaziy Osiyo respublikalari biri qoʼyib, boshqasi harbiy oʼquv mashgʼulotlar oʼtkaza boshlashdi. Аvgust oyida ham Oʼzbekiston va Qozogʼiston oʼz chegaralarida harbiy oʼquv mashgʼulotlarni oʼtkazgan edi. 1 avgustdan 10 avgust kuniga qadar esa Rossiya boshchiligida Oʼzbekiston va Tojikiston Аfgʼoniston bilan chegara yaqinida, Xatlon viloyatidagi “Harbmaydon” poligonida harbiy mashgʼulotlar olib bordi. 2 sentyabr kuni Qirgʼizistonning Botken va Oʼsh viloyatida “Janub-2021” harbiy oʼquv mashgʼulotlari boʼlib oʼtdi. 4 sentyabrgacha davom etgan mashgʼulotlarda 1500 ga yaqin oddiy fuqaro va 200 harbiy ishtirok etdi. Mashgʼulotdan maqsad “harbiy yoki favqulodda holat eʼlon qilinishi ortidan vaziyat keskinlashgan paytda harbiylarning davlat va mahalliy organlar bilan oʼzaro hamkorlikdagi harakatlarini muvofiqlashtirishini sinab koʼrish” ekanligi maʼlum qilindi. 7-9 sentyabr kunlari KXShTga aʼzo davlatlar Qirgʼizistonda “Rubej-2021” harbiy oʼquv mashgʼulotlar oʼtkazdi. Oktyabr oyida esa huddi shunday mashgʼulot Tojikistonda oʼtkazildi.
Ushbu harbiy mashgʼulotlarning barchasi rus rasmiylari tomonidan boʼrttirib koʼrsatilayotgan Аfgʼoniston “tahdidining oldini olish” va shu orqali Rossiyaning mintaqadagi harbiy ishtirokini kuchaytirishga qaratilgan. Mitnaqadagi mustabid rahbarlar ham oʼz rejimlarini saqlab qolish ilinjida Rossiya ortidan borish va shu bahonada Islom va musulmonlarga qarshi olib borayotgan reprissiv siyosatlarini yanada kuchaytirishga harakat qilmoqdalar. Xullas, Аfgʼoniston “tahdididan” har bir davlat – mustamlakchisi ham, ularning malaylari ham oʼz manfaatlari yoʼlida foydalanib qolishga intilmoqda.
Аbdurahmon Odilov
