Sadir Japarov rasmiy safar bilan Tүrkiyaga bordi
Qirg‘iziston prezidenti Sadir Japarov 9 iyun kuni Turkiya prezidenti Rajab Toyib Erdo‘g‘anning taklifiga binoan Turkiyaga bordi. Bu haqda Qirg‘iziston prezidenti matbuot xizmati xabar berdi.
Tashrif davomida Japarov Turkiya Prezidenti Rajab Toyib Erdo‘g‘an bilan ikki tomonlama muzokaralar o‘tkazdi.
Ikki mamlakat rahbarlari ikki tomonlama va ko‘p tomonlama hamkorlikni, shuningdek, Turkiy tilli davlatlarning hamkorlik kengashi doirasidagi o‘zaro aloqalarning dolzarb masalalarini muhokama qiladilar.
Qayd etilishicha, prezidentlar Qirg‘iziston va Turkiya o‘rtasidagi strategik hamkorlik oliy kengashining 5-yig‘ilishida qatnashadilar.
Rasmiy tashrif doirasida prezident Japarov Turkiya parlamenti spikeri Mustafo Shentop bilan ham uchrashadi. Shuningdek, Japarov Qirg‘iziston va Turkiya o‘rtasidagi biznes forumda ishtirok etadi,
Izoh: Bunga qadar Nur-Sulton, Toshkent, Moskva va Sochiga safar qilgan Sadir Japarov ilk xorijiy (possovet davlatlaridan tashqari) safarini Turkiyadan boshladi. Japarovning Rossiyaga amalga oshirgan tashrifi Putinning quruq va’dalaridan nariga o‘tmagani va Japarov qo‘ynini “puch yong‘oqqa” to‘ldirib, Tojikiston bilan bo‘lgan munosabatlarida keskinlikni yanada kuchaytirishga bo‘lgan undovidan boshqa, biror iqtisodiy loyiha yoki moddiy yordam masalasi muhokama qilinmadi. Aytish mumkinki, Japarovning Rossiyaga safari deyarli muvaffaqiyatsiz bo‘ldi.
Qirg‘izistonning hozirgi iqtisodiy holatida ko‘rsatiladigan har qanday iqtisodiy yordam muhim o‘rin egallaydi. Japarovning Turkiyaga amalga oshirayotgan safaridagi asosiy masala – investitsiya va iqtisodiy yordam ko‘rsatish masalasi bo‘ladi. Joriy yilning kuzida bo‘lib o‘tishi rejalashtirilgan parlament saylovlari oldidan Turkiyadan moliyaviy yordam olishga umid qilmoqda.
Bundan tashqari, qirg‘iz-tojik mojarosida rus hukumati tomonidan yakkalab qo‘yilgan Japarov Erdo‘g‘an bilan harbiy hamkorlik masalasini ham muhokama qilishi, Turkiyadan qirg‘iz armiyasini qayta qurollantirish bo‘yicha yordam so‘rash ehtimoli ham bor. Agar Japarov turk hukumati bilan harbiy hamkorlk masalasida kelishuvga erishadigan bo‘lsa, bu Turkiyaning mintaqada Turkiy tilli davlatlar hamkorlik kengashi nomi ostida turkiyzabon davlatlar o‘rtasida liderik ambitsiyasini yanada kuchaytiradi. Bu esa o‘z navbatida, mintaqada AQSh nufuzini oshishiga olib keladi.
Abdurahmon Odilov
