O‘zbekiston Afg‘onistonga elektr energiya etkazib berishni ko‘paytirdi
O‘zbekiston Afg‘onistonga eksport qilayotgan elektr energiyasi hajmi 400 megavattga etkazildi. Bu haqda “Tolonews” Da Afghanistan Breshna Sherkat (DABS) ga tayanib xabar berdi.
Kompaniya ma’lumotiga ko‘ra, mamlakatda elektr ta’minotini yaxshilash uchun import qilinayotgan elektr energiyasini 450 megavattga etkazish bo‘yicha choralar ko‘rilyapti.
Bir muddat O‘zbekistondan kelayotgan elektr energiya hajmi 150 megavattga tushib qolgan. Natijada so‘nggi kunlarda poytaxt Kobulning ba’zi tumanlarida faqatgina 20 daqiqa davomida elektr energiyasi bilan ta’minlangan.
Ma’lumotlarga ko‘ra, so‘nggi 18 yilda xalqaro hamjamiyat Afg‘onistonda infratuzilmani yaxshilash uchun 4 mlrd dollar ajratgan. Shuningdek, DABS har yili O‘zbekistonga elektr energiyasi uchun 100 mln dollar to‘laydi. Ammo tarmoqda qachon uzilish bo‘lishi va u qachon bartaraf etilishini aniq bilib bo‘lmaydi.O‘chirishga qadar Afg‘oniston O‘zbekistondan 450 megavatt elektr energiyasi import qilgan. Hozirda rasmiy Kobul o‘z ichki imkoniyatlari bilan 160 megavatt elektr energiya etkazib bera oladi.
So‘nggi 18 yilda Afg‘oniston Eron, O‘zbekiston, Tojikiston va Turkmanistondan elektr sotib olgan, ammo o‘z ichki resurslariga investitsiya kiritmagan.
Izoh: Mana qaryib 20 yildirki O‘zbekiston fuqarolari qish kelishini yurak xovuchlab kutib olishadi. Sababi, yoz oylarida ham paydar-pay o‘chib turadigan elektr energiyasi qish oylarida deyarli berilmay qo‘yiladi. Oddiy xalq gaz va svet muammosiga duch kelaverganidan bu taqchilliklarni engib o‘tish uchun muqobil isitish vositalarini topishga harakat qilib kelishadi. Odamlar gaz va svet yo‘qligiga shu darajada ko‘nikib ketishganki, bularning uzluksiz ta’minoti haqida orzu ham qilmay qo‘yishgan.
Bu yil ham havo haroratining keskin sovub ketishi O‘zbekiston xalqining shundoq ham qiyin kechayotgan hayotini yanada murakkablashtirib yubordi. Gazning yo‘qligi, elektr toki uzilishlari surunkali tus olganligi sababli, qodir bo‘lgani ko‘mir bilan, ko‘mir bo‘lmasa tezak yoki uyidagi mevali daraxtlar yo ko‘cha kuydagi daraxtlarni kesib kelib uylarini bir amallab istitayotgan oilalarni shoshiltirib qo‘ydi. Gaz va elektr ta’minotidagi beqarorliklar sababli har yili quz-qish mavsumida o‘nlab odamlar qurbon bo‘ladi. 16 dekabr kuni Shavkat Mirziyoev hukumat yig‘ilishida 2020 yil boshidan beri 106 inson is gazi va gaz chaqnashidan halok bo‘lgani, 190 nafar inson esa zaharlangani va kuyish tan jarohati olgani haqda aytgan edi.
O‘zbekiston hukumati bo‘lsa o‘z xalqi ehtiyoji va muammolarini e’tiborga olmay faqat o‘zlari oladigan daromad hamda xalqaro kelishuvlarni bajarishnigina o‘ylaydi. Xalqni esa qishli, ayozli kunlarda sovuq bilan yuzma yuz qoldirib kelmoqda.
Abdurahmon Odilov
