Qozog‘istonda Rossiya vaktsinasi ishlab chiqariladi
Qozog‘istonda 2020 yilning 22 dekabridan Rossiyaning “Sputnik V” vaktsinasini ishlab chiqarish yo‘lga qo‘yiladi, aholini ixtiyoriy ravishda ommaviy vaktsina bilan emlash ishlarini 2021 yildan boshlash ko‘zda tutilgan. Bu haqda Qozog‘iston prezidenti Kasim Jomart-Tokaevning bosh vazir Askar Mamin bilan bo‘lgan uchrashuvidan so‘ng ma’lum bo‘lgan, deb xabar qilmoqda Sputnik Qozog‘iston nashri.
“Davlat rahbariga alohida blokda uning Rossiya prezidenti Vladimir Putin bilan kelishuviga binoan shu yilning 22 dekabrida Qozog‘istonda Rossiyaning “Sputnik V” vaktsinasini ishlab chiqarish boshlanishi haqida xabar berildi. Mamlakat aholisini ommaviy ravishda ixtiyoriy emlashni boshlash ishlari 2021 yil boshidan rejalashtirilgan”, – deb yozadi Akorda.
Ta’kidlanishicha, birinchi bosqichda aholining virusni yuqtirib olish xatariga ko‘proq moyil bo‘lgan qismi, xususan, shifokorlar, pedagoglar va kuch tuzilmalari xodimlari qamrab olinadi.
Izoh: 2020 yil 1 avgustda Qozog‘iston Biologik xavfsizlik muammolari ilmiy-tadqiqot instituti ishlab chiqqan ikkinchi vaktsina ham Jahon sog‘liqni saqlash tashkiloti veb-saytida nomzod vaktsina sifatida muvaffaqiyatli ro‘yxatdan o‘tganligi ma’lum qilingan edi.
Qozoq matbuoti ham Jambil viloyati Biologik xavfsizlik muammolari ilmiy-tadqiqot instituti koronavirusga qarshi ishlab chiqqan vaktsina QazSOVID-In deb nomlani to‘g‘risida xabar tarqatdi.
“Vaktsina kimyoviy jihatdan o‘ldirilgan va tozalangan koronavirus bo‘lib, yordamchi moddalar bilan aralashtiriladi. Bu texnologiya uzoq vaqtdan beri ma’lum, shunga asoslanib biz birinchi navbatda huddi shunday vaktsina ishlab chiqarishga qaror qildik. Bundan tashqari institutimizning olimlari ushbu texnologiyani yahshi bilishadi va uni yaratishga oz vaqt talab qilinadi”, – degan edi o‘ta xavfli yuqumli kasalliklar laboratoriyasi boshlig‘i Lespek Kutumbetov.
Biroq, keyinchalik qozoq hukumati o‘z vaktsinasini ishlab chiqishdan voz kechgani haqida xabarlar paydo bo‘ldi. Albatta, bu voz kechish Rossiya bosimi ostida va uning manfaati yo‘lida bo‘ldi.
2-dekabr kuni Rossiya prezidenti administratsiyasi rahbari o‘rinbosari Dmitriy Kozak Vladimir Putin topshirig‘iga asosan Qozog‘istonga tashrif buyurib, prezident Qosim-Jomart Tokaev bilan uchrashib ketganidan so‘ng Qozog‘istonda rus vaktsinasini ishlab chiqarish jarayoni tezlashib ketdi…
Dunyoda sog‘liqni saqlash sektori jahon farmatsevtika sanoatini nazorat qiluvchi transkontinental kompaniyalar qo‘lida qoldi. Bu kompaniyalar sog‘liqni saqlash sektoridan shu qadar yirik daromad olishadiki, bu daromad neft kompaniyalari daromadidan ko‘p, “Microsoft” kabi raqamli dasturlar bilan ta’minlovchi kompaniyalar daromadiga yaqin hisoblanadi. Ushbu kompaniyalar faoliyatining kafolati bo‘lgan mustamlakachi kapitalistik davlatlar insoniyat uchun musibat bo‘lgan koronavirus pandemiyasidan ham o‘z manfaatlari, siyosiy va iqtisodiy ta’sirlarini yanada oshirish yo‘lida foydalanib, yangi bozorlar ochish va o‘z bozorlarini qo‘ldan chiqarmaslik yo‘lida raqobat qilishmoqda.
Abdurahmon Odilov
