Meriya: Bishkekda koronavirusga chalinish xavfi yuqori
Bishkekda koronavirusga chalinish xavfi yuqoriligicha qolmoqda, dedi Qirg‘iziston poytaxti meri o‘rinbosari Tatьyana Kuznetsova.
“Barcha holatlarning 63 tasi o‘zlari murojaat qilgani bois ro‘yxatga olindi, 34 nafarida kasallik sababi aniqlanmadi. Epidemiologik surishtiruv olib borilmoqda. COVID-19ga chalingan ayrim fuqarolar o‘zlarining yuqtirish sabablarini jamoat joylariga – bozor, savdo markazlari, jamoat transporti, jumladan mikroavtorbuslarda bo‘lishlari bilan izohlamoqda. Biz ishlarini kuchaytirdik, hamda hovlima hovli yurib qoidalarga rioya qilish va tashriflar hamda aloqa joylarini e’tiborga olish muhimligini tushuntirayapmiz”, – dedi Kuznetsova.
Izoh: Avvalroq mamlakat tezkor shtabi yig‘ilishida bosh vazir o‘rinbosari Kubatbek Boronov: “Bishkekdagi epidemiologik vaziyat xavotirli, statistika pasaymayapti”, – deya ta’kidlab o‘tgan edi.
Ma’lumki, davlatda sodir bo‘ladigan o‘zgarishlar, islohot va boshqa chora-tadbirlar asosan poytaxtdan boshlanadi. Qirg‘izistonda bo‘lib o‘tgan ikkita davlat to‘ntarishida ham poytaxt muhim rol o‘ynagan. Shu sababli har qanday davlatda asosiy e’tibor poytaxtga, u erdagi farovonlikni boshqa mintaqalarga ko‘ra ko‘proq ta’minlashga harakat qiladi. Poytaxt nazorat ostida bo‘ladigan bo‘lsa boshqa chekka hududlardagi nazorat ham davlatning qo‘lida bo‘ladi. Ayniqsa, “demokratiya orolchasi” degan nom olgan Qirg‘iziston poytaxti o‘tgan yillar mobaynida muxolifat va boshqa kuchlar tomonidan o‘tkazilgan mitinglar “o‘chog‘iga” aylanib qolgan edi. Endilikda rasmiy hukumat koronavirus pandemiyasiga qarshi kurash bahonasida muholifatni tiyib turish, norozilik namoyishlarining oldini olishga harakat qilib, asosiy e’tiborni poytaxtga qaratmoqda. Agar kuzda bo‘lib o‘tishi rejalashtirilgan parlament saylovlari arafasida muholifat qarshiligi kuchayib ketadigan bo‘lsa, hukumat yana qayta virus bahonasi bilan nafaqat poytaxt aholisini, balki butun mamlakatni yana qayta karantinga olish uchun zamin tayyorlamoqda.
Abdurahmon Odilov
