Favqulodda holat 30-aprelga qadar uzaytirildi
Qirg‘iziston prezidenti Sooronbay Jeenbekov mamlakatning ayrim shahar va qishloqlarida favqulodda holatni 30 aprelga qadar uzaytirish to‘g‘risidagi farmonni imzoladi. Bu haqda davlat rahbarining matbuot xizmati xabar berdi.
Farmonga ko‘ra Bishkek va O‘sh shaharlarida, O‘sh viloyatining Novqat va Qorasuv tumanlarida, Jalolobod shahrida va Jalolobod viloyatining Suzoq tumanida koronavirus tarqalishining oldini olish maqsadida avval joriy etilgan favqulodda holat uzaytiriladi.
Farmon imzolangan paytdan boshlab kuchga kirdi va tasdiqlash uchun Jogorku Keneshga yuborildi.
Izoh: Koronavirus pandemiyasi Qirg‘iziston iqtisodi naqadar nochor ahvolda ekanligini fosh qilib qo‘ydi. Hukumat etakchi davlatlarga taqlid qilib, mamlakatda favqulodda holat e’lon qilgan kundan beri o‘tgan 20 kunga yaqin vaqt davomida prezident Jeenbekov dunyodagi deyarli barcha xalqaro moliyaviy tashkilotlarga pandemiyaga qarshi kurash va qirg‘iz iqtisodini saqlab qolish uchun moliyaviy ko‘mak ko‘rsatishlari so‘rab murojaat qilib chiqdi.
Ammo Qirg‘izistonda chuqur ildiz otgan yana bir illat – korruptsiya balosi olinayotgan bu qarzlar va ko‘rsatilayotgan inmonparvarlik yordamlari o‘z o‘rniga, haqdorlarga etib borishini savol ostida qoldiradi. Hukumat xalqni ommaviy uyga qamab, ularni tirikchilik vostialaridan mahrum qildi. Biroq, xalqqa ko‘rsatiladigan yordam, ishsiz qolganligi uchun evaz to‘lash tizimi esa yo‘lga qo‘yilmadi. Xalqning esa turmush darajasi kundan kunga nochorlashib bormoqda. O‘zi o‘tgan 20 kun mobaynida ham kunlik tirikchiligi uchun kunda pul topadigan oilalar qiyin vaziyatga tushib qolgan va asosan xalq ichidagi sahovatli odamlar ko‘rsatayotgan moddiy yordam ortidan kun o‘tkazib kelishayotgan edi. Endigi ikki haftalik favqulodda holat oddiy xalq uchun yana qo‘shimcha muammolarni paydo qilish shubhasiz. Shu sababli ham rasmiy hukumat fuqarolarning o‘z holiga tashlab qo‘ymay ularga yordam ko‘rsatish choralarini ko‘rishi zarur. Fuqarolar hukumat qaroriga itoat qilib uylarida o‘tirishibdimi, demak hukumat ham o‘z zimmasidagi majburiyat – ularning asosiy ehtiyojlarini ta’minlab berish vazifasini ado etishi shart.
Abdurahmon Odilov
