Rossiya Qirg‘izistonga ikki dona harbiy vertolyot va radioaloqa stantsiyasi sovg‘a qildi
Rossiya Qirg‘izistonga ikki dona ko‘pnishonli MI-8MT vertolyotlarini va P-18 radioaloqa stantsiyalarni sovg‘a qildi. Bu haqda “Sputnik” Qirg‘iziston xabar qildi.
Texnikani taqdim etish tantanali marosimi Qantdagi Qirg‘iziston Qurolli kuchlari havo mudofaa kuchlarining aviatsiya-texnika hududida o‘tkazildi.
Marosimda Qirg‘iziston Qurolli kuchlari qo‘mondonlik shtabi boshlig‘i muovini Nurlan Chomoev va Rossiya mudofaa vaziri o‘rinbosari Aleksandr Fomin nutq so‘zladi.
P-18 radioaloqa stantsiyasi – havo ob’ektlarini aniqlaydi va kuzatadi, ularning koordinatalarini o‘lchab, qaysi davlatga tegishligini aniqlaydi.
Ko‘pnishonli MI-8MT vertolyoti zarba berish, dushman otish joylarini yakson qilish uchun mo‘ljallangan. Quruqlikdagi qo‘shinlar, o‘q-dorilar, qurol-yarog‘larni, yuklarni va dori-darmonlarni tashish, yaradorlarni evakuatsiya qilishda foydalanish mumkin.
Izoh: Rossiya Qirg‘izistonni Evrosiyo iqtisodiy ittifoqiga olib kirish arafasida qirg‘iz qurolli kuchlariga harbiy yordam ko‘rsatish majburiyatini olgan edi. Joriy yil boshida Rossiya ushbu kelishuv doirasida Qirg‘izistonga chegarani qo‘riqlash va nazorat-o‘tkazish punktlarini jihozlash uchun 123ta harbiy avtomobil va injenerlik texnikasini etkazib bergan edi. Yordamni topshirish marosimi Bishkekdagi Ala-Too maydonida 2019-yil 15-yanvar kuni bo‘lib o‘tgan, unda prezident Sooronbay Jeenbekov va hukumat a’zolari qatnashgandi. Keyinchalik, ijtimoiy tarmoqlar orqali tarqatilgan videolarda Rossiya “yordami” bo‘lgan harbiy avtomobillar “UAZ”larni haqiqiy ahvoli ko‘rsatilib, ular faqat tashqi ko‘rinishidan avtomobil holatida ekanligi, hatto salonlari jihozlanmagani ma’lum bo‘lgan edi.
Ma’lumki, SSSRdan Rossiyaga meros bo‘lib qolgan ulkan harbiy texnikalar allaqachon o‘z muddatini o‘tib bo‘lgan. Bu texnikalar zahira qurollari nomi bilan yaroqsiz ahvolda ulkan harbiy mozorlarda saqlab turiladi. Rossiya o‘zi uchun keraksiz va yaroqsiz bo‘lgan eski texnikalarini Qirg‘izistonga olib kirib kelyapti. Bu bilan u bir vaqtda ikki manfaatni qo‘lga kiritadi. Birinchidan, xizmat muddatini o‘tab bo‘lgan va zamonaviy talablarga javob bermay qolgan eski harbiy texniklardan qutuladi. Ikkinchidan, eski texnikalarini va hozirda ehtiyoji bo‘lmagan zahira anjomlarini Qirg‘izistonga o‘tkazish orqali o‘ziga bo‘lgan harbiy qaramligini yanada kuchaytirib oladi. Bundan tashqari, bu qurollar “terrorist” nomidagi sun’iy dushmonlarga, chegara mojaralariga, yoki halq qo‘zg‘olanlariga qarshi ishlashdan boshqasiga yaramaydi.
Abdurahmon Odilov
