Rossiya Tojikistonga 5 mln dollarlik harbiy texnika va qurollar taqdim etdi
Markaziy harbiy okrug qo‘mondoni Aleksandr Lapinning so‘zlariga ko‘ra, Rossiya Tojikistonni Markaziy Osiyo hududidagi asosiy ittifoqdoshi sifatida ko‘radi va milliy qurolli kuchlarni modernizatsiya qilish dasturi doirasida uning mudofaa salohiyatini mustahkamlashga ko‘maklashadi.
Rossiya harbiylari Tojikiston qurolli kuchlariga beg‘araz asosda umumiy qiymati 320 mln rubllik (5 mln dollar) harbiy texnika va qurol-yarog‘lar partiyasini taqdim etdi. Bu haqda Rossiya markaziy harbiy okrugi matbuot xizmati xabar berdi.
Taqdimot marosimi Dushanbeda Kollektiv xavfsizlik shartnomasi tashkilotining “Buzilmas qardoshlik – 2019” o‘quv mashg‘ulotlari yakunlanganidan so‘ng bo‘lib o‘tdi.
Izoh: Aslida 5 million dollar harbiy soha uchun aytarli darajada yirik mablag‘ emas. Chunki qurol ishlab chiqaruvchi davlatlar harbiy qurol-yaroq va texnikalarga o‘ta qimmat narx belgilagan. Masalan, Rossiya ishlab chiqargan “Armata” tankining narxi buyuritma ko‘lamidan kelib chiqib 5,5 million dollardan 7,7 million dollargacha o‘zgarib turadi (buyuritma qancha ko‘p bo‘lsa narx ham shuncha arzon bo‘ladi). BTR-82A ning narxi 490 000 dollar…
Bundan tashqari, bu davlatlar hech qachon eng so‘nggi rusimdagi qurol va harbiy texnikalarni o‘ziga karam davlatga sotmaydi yoki tortiq qilmaydi. Ular etkazib beradigan qurollar eski qurollar bo‘lib, ulardan kuchli va zamonaviy bo‘lgan so‘nggi avlod qurollarini o‘z armiyalarini kuchaytirishga yo‘naltirishadi.
Rossiya garchi etkazib bergan qurollarini beg‘araz deb iddao qilayotgan bo‘lsada, buning zamirida Tojikistonni harbiy sohada yanada o‘ziga ko‘proq qaram qilib olish, harbiy ishtirokni yanada kuchaytirishni rejalashtirgan bo‘lsa, boshqa tomondan Markaziy Osiyoda tobora kuchayib borayotgan AQShning harbiy yordamlar ko‘rinishida kirib kelishiga to‘siq qo‘yishni maqsad qilgan.
Abdurahmon Odilov
