O‘zbekiston ustida nufuz talashish davom etmoqda
AQSh savdo vazirining O‘zbekiston haqida bayonoti raqobatbardosh bo‘lmagan kurash usullaridan foydalanish deb qaralishi mumkin, deb ta’kidladi Rossiya bosh vaziri Dmitriy Medvedev Evroosiyo hukumatlararo kengash yig‘ilishida. Bu haqda RIA “Novosti” xabar qilmoqda.
Chorshanba kuni Vashingtonda bo‘lib o‘tgan o‘zbek-amerika biznes-forumi doirasida AQSh savdo vaziri Uilbur Ross O‘zbekistonning Evroosiyo iqtisodiy ittifoqiga qo‘shib olinishi mamlakatning Butunjahon savdo tashkilotiga a’zo bo‘lishi jarayonini sezilarli qiyinlashtirishi mumkinligi haqida bayonot qildi.
“Bugun AQShdan … vazirlardan biri… O‘zbekiston Evroosiyo ittifoqi bilan hamkorlik qilsa, O‘zbekistonga JTSga kirishini qiyinlashtiradi deb aytdi. Bu erda nima deyish mumkin? Bu, shubhasiz, raqobatbardosh bo‘lmagan kurash usullarini qo‘llashdir va dunyo savdosini tashkil qilishda chalkashliklarni keltirib chiqaradigan, savdo urushlarini olib boradigan va xalqaro savdoni tartibsizlantiradigan Amerika ma’muriyatining bu bayonotlarini eshitish g‘alati”, – dedi Medvedev.
Uning taxminiga ko‘ra, ehtimol “okean ortidagi hamkasblar”ga Rossiya o‘z qit’asi hududida integratsiya jarayonlari va imzolayotgan kelishuvlar yoqmayapti. Biroq, Medvedevning so‘zlariga ko‘ra, shubhasiz barcha yo‘nalishlarda ish davom ettiriladi.
Bundan oldin O‘zbekistonga tashrif buyurigan Rossiya Federatsiyasi Federatsiyalar kengashi raisi Valentina Matvienko O‘zbekiston Evrosiyo iqtisodiy ittifoqiga qo‘shilish masalasini ko‘rib chiqayotgani haqida ma’lum qilgandi.
“O‘zbekiston prezidenti bir qarorga kelgan va O‘zbekistonning Evrosiyo iqtisodiy kengashiga qo‘shilishi masalasi ko‘rib chiqilmoqda”, – degan edi Matvienko Oliy Majlis Qonunchilik palatasi spikeri Nurdinjon Ismoilov bilan uchrashuv chog‘ida.
O‘zbekiston Markaziy Osiyoda ikki mustamlakachi davlat Amerika va Rossiyaning geosiyosiy nufuz talashish markaziga aylanib bormoqda. Mirziyoev zimmasida Karimovdan meros bo‘lib qolgan abgor iqtisodni oyoqqa qo‘yish hamda bo‘shab qolgan davlat g‘aznasini to‘ldirish vazifasi turipti. Shu sababli ham Mirziyoev o‘zini dunyo hamjamiyatiga demokratik islohotchi sifatida ko‘rsatib, g‘arb davlatlari ajratadigan moliyaviy yordamlarni olishga harakat qilmoqda.
O‘zbekiston uchun AQShning siyosiy qo‘llovi va moliyaviy yordamlari juda muhim. Shuning uchun u AQSh yordam beramiz, sarmoya kiritamiz, harbiy yordam ko‘lamini oshiramiz degan va’dalari oldida turib berishi qiyin. Ammo Rossiyani ham rozi qilmasdan iloji yo‘q. Chunki, Rossiya O‘zbekiston qishloq xo‘jalik maxsulotlarining asosiy xaridori. Bundan tashqari, Rossiyaning mintaqadagi harbiy ta’siri va ishtiroki kuchli. Shu sababli ham O‘zbekiston har ikkisini rozi qilish yo‘lini izlashga majbur bo‘ladi.
Abdurahmon Odilov
