بِسْمِ اللهِ الرَّحْمٰنِ الرَّحِيمِ
Shom qoʻzgʻoloni yangilanib, yoʻlini toʻgʻrilab olmoqda
Ustoz Muhammadsaid Abud
(Abu Musʼab Shomiy)
Muborak Shom qoʻzgʻoloni shunday bir toyilishlarga, xavfli burilishlarga duch keldiki, uni yoʻq qilishlariga bir baxya qoldi. Biroq xalqaro makrlarga va nopok til biriktiruvlarga qaramay, qayta yangilanib, yoʻlida davom etishi uchun Alloh Subhanahu va Taolo bu qoʻzgʻolonga yaxshilik urugʻlarini ekib, immunitetini kuchaytirib qoʻydi.
Xalqaro hamjamiyat Asad rejimini qoʻzgʻolonni yoʻq qilishga qoʻyib berdi, biroq bunga muvaffaq boʻla olmadi. Shunda Amerika yetakchiligida xalqaro kuchlar aralashib, yashirin va oshkora uni qoʻllab-quvvatlay boshladi.
Bu rejimni oshkora qoʻllab-quvvatlashlariga kelsak, unga qulaylik yaratib, Eronning Livandagi Hizbi kabi xorijiy jangarilar hamda iroqlik va eronlik jangarilar bilan yordam berishdi. Ammo rejim shu jangarilar yordamida ham qoʻzgʻolonni yoʻq qilishga ojizlik qildi.
Keyin Eron aralashib, qoʻllab-quvvatlovchi davlat sifatida, unga siyosat, qurol-yarogʻ, mablagʻ va jangarilar bilan madad berdi. Bu borada Kufiyo va Fua, Zibadoniy va Mizoya ittifoqlarini unutganimiz yoʻq! Bu ittifoq qoʻzgʻolon devoridagi birinchi darz ketish boʻldi, Alloh bunday qilmish egasini yuzini teskari qilsin. Chunki oʻsha paytda rejim bilan muzokara qilish xiyonat, deya tushunilar edi, zum oʻtmay bu tushuncha parchalandi!
Shuningdek, xalqaro qudrat sifatida, Rossiya havodan, dengizdan va quruqlikdan aralashdi. Uning aralashuvi tarozi pasangisini rejim foydasiga hal qildi. Biroq agar xalqaro yashirin qoʻllab-quvvatlov boʻlmaganda edi, bu tarozidan olingan samara rejimga tatimagan boʻlar edi. Chunki xalqaro yashirin qoʻllab-quvvatlovda davlatlar oʻzini suriyaliklarga doʻst qilib koʻrsatdi. Ayniqsa, AQSh zohirda qoʻzgʻolonni qoʻllab-quvvatlagan va rejimga qarshi kurashayotgan davlat sifatida namoyon boʻldi. Aslida esa, Amerika qoʻzgʻolonni yoʻq qilish uchun rejimga bir yil muhlat berdi va 2012 yilda unga besh milliard dollar yordam taqdim etdi. Chunki oʻshanda Suriya valyutasi qiymati keskin suratda tushib ketgandi va buni Vikiliks hujjatlari ham fosh etgan.
Bir vaqtning oʻzida, Amerika Saudlar oilasi va Erdogan kabi malaylariga buyurib, mablagʻ va qurol-yarogʻ yetkazib berish orqali qoʻzgʻolonni jilovlab olishni, qarorlarini nazorat ostiga olib, yetakchiligini qoʻzgʻolonni butunlay vayron qiladigan tomonga yoʻnaltirishni tayinladi. Shu “qoʻllab-quvvatlovchi” davlatlar makri bilan birinchi Xoms, ikkinchi Halab bilan Sikka sharqi, uchinchi Xoms va Hama atrofi, toʻrtinchi Gʻuta, Qalamun, Damashq atroflari, beshinchi Darʼa bilan Hivron qoʻldan boy berildi… Sochi konferentsiyasi orqali Idlib, Halab gʻarbi va shimolida qoʻzgʻolonni butkul yoʻq qilishga urinishmoqda…
Qoʻzgʻolon boshiga shuncha balolar solingani va hamon solinayotgani shuni tasdiqlab turibdiki, oʻzlarini qoʻllab-quvvatlovchi va yordam beruvchi ekanliklarini daʼvo qilgan davlatlar daʼvosi gʻirt yolgʻondir. Chunki qoʻzgʻolonni shu ahvolga giriftor etganlar aynan shu davlatlardir.
Qoʻzgʻolon yoʻliqqan ushbu toyilish va xavfli burilishlardan hamma kartalar ochildi, basharalar, makru tuzoqlar fosh boʻldi. Bular xalqaro vakillar va komissiyalardan iborat boʻlib, elchixonalar yoʻlaklarida, razvedka xizmatlarida, konferentsiyalarda, yarashuv va muzokaralarda namoyon boʻldi. buning natijasida, yuqoridagilarning har biridan ogohlantirgan va toʻgʻri pozitsiyani koʻrsatib bergan ishonchli va xolis nasihatgoʻyning ham kimligi oydinlashdi. Shu bilan birga, qoʻzgʻolonni sotgan yolgʻonchilaru ahmoq goʻllarning ham kimligi fosh boʻldi.
Ammo qoʻzgʻolon behisob kuchlar va nopok makru tuzoqlarga yuz tutib, ular qarshisida sabot bilan tura oldi. Bu esa, Shom qoʻzgʻoloni va ahlining ilohiy inoyatdan, rabboniy gʻamxoʻrlikdan ayrilmaganiga dalolat qiladi. Zaiflashish, toyilish, xavfli burilish bosqichlarida har safar ong kasb qildi, immunitetini yoʻqotmadi.
Shubhasiz, bugungi kunda qoʻzgʻolon shuncha toyilishlar ortidan yangilanmoqda, avvalgi siyratiga qaytib, yoʻlini tuzatib olmoqda va bularni ongli ravishda qilmoqda, oʻziga qarshi atrofida boʻlayotgan til biriktiruvlarni anglamoqda. Mana, Darʼa zirhli qoʻzgʻolon sifatida sapchib turdi, biroq yana aldashga urinadigan anavilardan qattiq ehtiyot boʻlyapti. Chunki “qoʻllab-quvvatlovchi” davlatlar ularni mol bilan fitnaladi… oqibatda, ular qoʻzgʻolonni sotishdi, jinoyatkor jallod qoʻliga yurtu faqaroni taslim qilishdi.
Hivrondagi yangi harakat qoʻzgʻolonga yaxshilik boʻlishidan, uning davom etishidan bashoratdir. Shuningdek, barcha fitna va aldovlar qarshisida magʻrur turadigan, hargiz oʻlmaydigan, aksincha, to nusrat qozonib, gʻoyasiga yetguniga qadar yangilanib, kattalashib boradigan qoʻzgʻolon ekanidan darakdir.
Shuncha shahidlik, jarohat, tajovuz va qochqinliklar hamda yurtu xonadonlarning vayron etilishi, bularning barchasi qoʻzgʻolon ongidagi immunitetdir. U qoʻzgʻolonni jinoyatkor qotilga taslim boʻlishdan yoki unga ishonishdan yoxud tuzogʻiga tushishdan saqladi.
Shuningdek, rejim armiyasidagi boʻlinishlar, Gʻuta va Xoms shimolidagi baʼzi harakatlar hamda rejim nazorati ostida boʻlgan mintaqadagi ayrim amaliyotlar qoʻzgʻolonning sogʻayganiga, qayta oyoqqa qalqib harakatlana boshlaganiga dalolat qilmoqda.
Idlib va uning atrofi, Halab va uning shimoliyu gʻarbiga kelsak, bu yerlar qoʻzgʻolonning soʻnggi qalʼasi va katta umid oʻchogʻi boʻlib, Shomning hamma mintaqalaridan kelgan, oʻzlarida ixlos va sobitqadamlik sifatlarini namoyon etgan mujohidlarga toʻldi. Ular bugun ajoyib janglar va buyuk qahramonliklar koʻrsatib, Rossiyani hamda rejim va jangarilardan iborat yordamchilarini quvib solmoqdalar. Ushbu maʼrakalarda Abdulbosit Sarutning shahid boʻlishi yashirin tuygʻularni qoʻzgʻadi, qoʻzgʻolonning unutayozgan xotirasini, birligini qaytardi hamda toʻgʻri yoʻlini topishi kerakligi toʻgʻrisida andak ong berdi.
Qoʻzgʻolonni qoʻllab-quvvatlovchi xalqqa kelsak, ular davlatlararo makrni angladilar, anglaganlari uchun ham, ogʻir qurollarni topshirish, qurolsizlangan bufer zonalar yaratish, Halab-Loziqiya va Halab-Damashq xalqaro yoʻllarini ochish kabi Sochi rejalarini barbod qildi. Bunday xoinlik rejalarining barchasiga qarshi chiqib, Allohning madadi ila, namoyishlar va yurishlar bilan ularni fosh etib, barbod qilishdi. Hatto anjuman va konferentsiyalar oʻtkazish orqali mujohidlarni bagʻriga olganlarini eʼlon qildi. Qoʻzgʻolon va jihodning davom etishini har doim qoʻllab-quvvatlash, frontlar ochish, xususan, Sohilda va rejim nazorati ostidagi hududlarda rejim magʻlubiyatidan darak beruvchi frontlar ochish bilan yoʻlini doim toʻgʻrilab borishni talab qilib borishga ahd qildi.
Ha, qoʻzgʻolonni qoʻllab-quvvatlovchi xalq talablari va harakati qoʻzgʻolonni yangilamoqda, yoʻlini isloh qilib, til biriktiruvlar stolini toʻntarib tashlamoqda, shuningdek jihodda sobit turish, frontlar ochishga, yarashuv va muzokaralarga qarshi chiqishga, mujohidlarni mahoratli, maxsus va sotilmagan sof, bitta harbiy yetakchilik ostiga birlashishga va bu yetakchilarni oʻzlari tanlashlariga chaqirib keldi. Zero, bugungi kundagi yetakchilar “qoʻllab-quvvatlovchi” davlatlar bilan aloqa bogʻlab, mustaqil qaror qabul qilolmaydigan, chora-tadbir koʻrolmaydigan, qizil chiziqdan nariga oʻtolmaydigan, eng muhimi, Sohil frontini ochmaslikka amal qiladigan yetakchilarga aylanib qolishdi. Shuningdek, bu yetakchilar oʻzlarining shaxsiy manfaatlari, qoʻzgʻolondan undirishgan boyliklari va anavi davlatlardan berilgan mablagʻlarga ham bogʻlanib qolib, Ummat, qoʻzgʻolon va mujohidlar taqdirlari haqida toʻgʻri fikrlashni yoʻqotib qoʻyishdi. Yoʻqotib qoʻyishdigina emas, balki qoʻzgʻolonga ham manfaat koʻzi bilan boqadigan, qoʻzgʻolondan manfaat olishga harakat qiladigan boʻlib qolishdi! Bu esa, qoʻzgʻolonni xuddi Gʻazo bilan Hamas va Gʻarbiy Sohil bilan Abbos voqeiga oʻxshatib qoʻydi!!
Qaror chiqaruvchi qoʻzgʻolonni qoʻllab-quvvatlayotgan xalqdir. U qoʻzgʻolonning oʻz yoʻlini toʻgʻrilab olmogʻi kerakligini oʻzidagi mavjud ong bilan anglab yetmoqda. Yoʻlini toʻgʻrilash esa, xorijiy davlatlar bilan aloqani uzish hamda davlatlarning “qoʻllab-quvvatlov”i va iflos pullaridan yuz oʻgirish bilan boʻladi. shuningdek, Alloh uchun xolis amal qiladigan va xorij bilan aloqa qilmaydigan, qoʻlida Ummat aqidasiga asoslangan va islomiy shariatga tayangan ochiq keng qamrovli siyosiy loyihasi bor biror ongli siyosiy yetakchilikni qabul qilish bilan amalga oshadi.
Yuqorida aytilganlarning barchasi qoʻzgʻolonni qoʻllab-quvvatlovchi xalq tomonidan talab qilindi hamda ozod etilgan Idlib shimolida yaqinda oʻtkazilgan konferentsiyada bayon qilindi. “Hokimiyat Ummatniki” konferentsiyasiga Shomdagi turli shahar va rayonlardan nufuzli kishilar, ziyolilar, faollar, qoʻzgʻolon peshvolari, mujohidlar va baʼzi harbiy yetakchilar qatnashdi.
Xullas, qoʻzgʻolon oʻz hokimiyatini va qarorini qaytarib olishga harakat qilyapti, uning boʻyniga minib, hukmron boʻlib olgan, qoʻzgʻolonni sotib yuborayotgan kimsalardan qaytarib olmoqchi. Shu bilan birga, toʻla toʻkis yoʻlini toʻgʻrilab, yangilanib olishga urinmoqda. Buning bashorati alomatlari Idlib va Hivronda namoyon boʻlmoqda va albatta bu Allohning fazli va madadi iladir, U yordam beruvchi va qudrat sohibidir.
Roya gazetasidan olindi
