Oq Uy: Tramp va Erdogʻan Suriya masalasida kelishib oldi
Aqsh Prezidenti Donald Tramp Turkiya prezidenti Rajab Toyyib Erdogʻan bilan Suriyada xavfsizlikka erishish uchun tashlanadigan qadamlar borasida oʻzaro muvofiqlikni davom ettirishga kelishib oldi. Bu haqida ikki rahbar oʻrtasida boʻlib oʻtgan telefon suhbatidan soʻng Oq Uydan berilgan bayonotda maʼlum qilindi.
“Ikki mamlakat rahbarlari, Turkiya va Amerika Qoʻshma Shtatlarining Suriyadagi xavfsizlik tashvishlari va ikki tomonlama masalalar, shu jumladan terrorizmga (Islomga) qarshi kurash masalalarini muhokama qilishdi. Ikki davlat rahbarlari Suriyada har ikki davlatning xavfsizlik maqsadlari amalga oshirilishi uchun muvofiqlikni davom ettirishga kelishib olishdi”, deyiladi Oq uy matbuot kotibi Sara Sanders tarafidan berilgan matbuot bayonotida.
Tramp va Erdogan suhbatidan soʻng Turkiya tashqi ishlar vaziri Mevlut Chavushoʻgʻli Turkiya hukumatining Asad bilan hamkorlik qilishi mumkinligini bildirdi. Chavushoʻgʻliga koʻra, agar Suriyadagi saylovlarda Bashar Asad gʻolib chiqadigan boʻlsa, Anqara u bilan hamkorlik qilish imkoniyatlarini koʻrib chiqisha tayyordir.
Oʻtgan oktyabr oyida AQShning Suriya masalasi boʻyicha maxsus vakili Jeyms Jeffri Suriyadagi maqsadlar borasida Oq uy maʼmuriyati Turkiya bilan hamfikr ekanligini va Turkiyaning Suriya sohasida tashlagan qadamlaridan AQSh mamnun ekanligini bildirgan edi.
“Prezident (Donald Tramp) tomonidan BMT Bosh Assambleyasida ilgari surilgan Suriyadagi bizning asosiy maqsadlarimiz masalasida Turkiya prezidenti biz bilan hamfikrdir”, “Turkiya turli diplomatik va harbiy qadamlar tashlab, soʻzida turishini isbotladi. Bu juda muhimdir” degan edi Jeffri.
