Qirgʻiziston bosh vaziri korruptsiyada ayblangan Bishkek merini isteʼfoga chiqardi
Qirgʻiziston bosh vaziri Muhammadkali Abilgaziyev milliy xavfsizlik davlat qoʻmitasi xodimlari tomonidan qoʻlga olingan Bishkek meri Albek Ibraimovni vazifasidan ozod qildi, deb xabar berdi “Interfaks”.
Agentlik suhbatdoshining aytishicha, Ibraimov Bishkek shahar kengashi unga bir ovozdan ishonchsizlik bildirgach lavozimidan boʻshatilgan.
Mer payshanba kuni korruptsiya va mablagʻlarni nooʻrin sarflashda gumonlanib hibsga olindi.
Ibraimov sobiq prezident Almazbek Atambayev davrasidagi yaqin kishilardan boʻlib, u Sooronbay Jeenbekov prezident etib saylanganidan soʻng oʻz lavozimida qolgan soʻnggi mansabdor edi. U 2012-2013 yillarda prezident devoni rahbarining oʻrinbosari boʻlib ishlagan, 2016 yil fevralda Bishkek meri etib saylangandi.
