Eron iqtisodining tanazzulga yuz tutishi xalqning noroziligiga sabab boʻlmoqda!
Eronda yuzaga kelgan iqtisodiy inqirozga qarshi koʻplab shaharlarda, shu jumladan, poytaxt Tehronda minglab odamlarning noroziliklari kuchayib bormoqda. Eron prezidenti Hasan Ruhoniy davlat televideniyasi orqali xalqqa murojaat qilib, birdamlikka va AQShning hiylasiga uchmaslikka chaqirdi. Ruhoniy oʻz murojaatida iqtisodiy inqirozga oid hukumat boshqaruviga qaratilgan tanqidlarga raddiya bildirar ekan, mavjud hukumatning istefoga chiqishini inkor qildi.
“Agar baʼzilar hukumatni “qoʻrqdi va oʻz yoʻnalishidan chekindi”, deb oʻylayotgan boʻlsa, notoʻgʻri oʻyga boribdi. Hukumat aslo istefo bermaydi”, deya taʼkidladi Ruhoniy.
Mahalliy matbuoti xabarlariga koʻra, Eron Oliy rahbari Ali Xomanaiyning harbiy maslahatchisi general-mayor Yahyo Rahim Safavi mamlakatda tartibsizliklarning yuzaga kelishida Eron hukumatining boshqaruvini tanqid qilgan. Hukumat xalqning muammolari bilan shugʻullanmaganligini, bu esa, xalq orasida bir qancha noqulayliklarga sabab boʻlganligini bildirgan Safavi, baʼzi guruhlar bu vaziyatni rejimga qarshi norozilikka aylantirishga urinayotganini qayd etdi. Eron iqtisodiy, madaniy va ijtimoiy muammolarga duch kelganligini tilga olgan Safavi prezident Hasan Ruhoniy boshchiligidagi hukumatni tanqid qilib, “bu hukumat boʻlmasa edi, mamlakat yanada yaxshiroq boshqarilishi koʻrinib turibdi”, dedi.
Hozirda Eronning poytaxti Tehronda va yana bir qancha shaharlarda, iqtisodiy inqirozga qarshi noroziliklar namoyishlari davom etmoqda. Parlamentga qarab yura boshlagan namoyishchilarga qarshi Eron politsiyasi koʻz yoshartuvchi gaz bilan toʻsqinlik qilgan. Mazkur namoyish 2012 yildan buyon Tehronda boʻlib oʻtgan namoyishlarning eng kattasi sifatida baholanmoqda.
Xabarlarda aytilishicha, namoyish chogʻida “Diktatorga oʻlim” kabi shiorlar yangramoqda. Vaqti-vaqti bilan namoyishchilar va politsiya oʻrtasida toʻqnashuv ham yuz beryapti. Parlament raisining oʻrinbosari hukumatni mamlakatda favqulodda holat eʼlon qilishga chaqirgani aytilmoqda.
