Yangi bosh vazir lavozimga tasdiqlandi
Qirgʻiziston prezidenti Sooronbay Jeenbekov Muhammadkali Abilgaziyevni respublika bosh vaziri lavozimiga tayinlash toʻgʻrisidagi farmoniga imzo chekdi. Bu haqda prezident matbuot xizmati xabar bergan.
“Qirgʻiziston respublikasi prezidenti Sooronbay Jeenbekov Abilgaziyev Muhammadkali Duyshekeyevichni Qirgʻiziston Respublikasi bosh vaziri etib tayinlab toʻgʻrisidagi farmonini imzoladi. Shu farmon bilan u avvalgi lavozimidan ozod etildi”,- deyilgan xabarda.
Prezident Abilgaziyev tomonidan taklif etilgan nomzodlarni Vazirlar mahkamasi aʼzolari sifatida tasdiqlagan.
Juma kuni Qirgʻiziston parlamenti Abilgaziyevni mamlakat bosh vazirligi uchun maʼqulladi. Yangi bosh vazir taklifiga koʻra, hukumatning avvalgi aʼzolarining koʻpchiligi oʻz oʻrnini saqlab qolgan. Bosh vazirning birinchi oʻrinbosari lavozimiga Kubatbek Boronov (Sobiq FVV vaziri) tasdiqlangan. “Respublika – Ata-Jurt” partiyasi deputati Oltinoy Omurbekova Cholpon Sultonbekova oʻrniga ijtimoiy masalalar boʻyicha bosh vazir oʻrinbosariga aylangan.
Shuningdek, Mudofaa vazirligiga respublika qurolli kuchlarining sobiq boshligʻi Erlis Terdikbayev rahbar boʻlgan. Tashqi ishlar vaziri Erlan Abdildayev oʻz joyini saqlab qolgan. Sogʻliqni saqlash vazirligi rahbarligiga Kosmosbek Cholponbayev kelgan, Iqtisodiyot vazirligiga Oleg Pankratov qaytgan, IIV rahbarligini bir necha oy oldin tark etgan Kashkar Junushaliyev qayta egallagan. Nurbolot Mirzaxmedov FVVga rahbar boʻlgan.
Abilgaziyev Sooronbay Jeenbekov bosh vazirligida uning birinchi oʻrinbosari boʻlgan. Jeenbekov prezident boʻlgach, 2017 yil kuzida u prezident maslahatchisiga aylangan, keyinroq Qirgʻiziston prezidenti apparati rahbari boʻlgandi. Muhammadkali Abilgaziyev respublikaning hisob boʻyicha oʻttizinchi bosh vaziri hisoblanadi.
