Armanistonda “baxmal inqilobi” boshlandi
Armaniston “Fuqarolik kelishuvi” muxolif partiyasi rahbari, parlament deputati Nikol Pashinyan mamlakatda “baxmal inqilobi” boshlangani haqida eʼlon qildi. Bu haqda TASS axborot agentligi xabar tarqatmoqda.
“Mamlakatda inqilobiy vaziyat yuzaga keldi. Gyumri, Idjevan, Vanadzor, Kapan va Metsamor shaharlarida ham namoyishchilar koʻchalarni va xalqaro trassalarni toʻsib qoʻyishmoqda. Odamlar ishga chiqmayapti, ommaviy ish tashlashlar boshlandi”,- degan u.
Ayni vaqtda Armaniston parlamentida mamlakatning sobiq prezidenti Serj Sargsyanni bosh vazir etib saylashga bagʻishlangan yigʻilish oʻtkazilmoqda. Sargsyanning nomzodi hukmron Respublika partiyasi tomonidan ilgari surilgan.
16 aprel kuni avjiga chiqqan namoyishchilar bugun ham davom etdi, muxolifat tarafdorlari Yerevan markazidagi parlament binosini qamalga olishgan, radikal muxoliflar shahar markazi boʻylab marsh uyushtirishmoqda, politsiya bilan toʻqnashuvlar roʻy bermoqda. Muxolifatchilar yetakchisi maʼlumotlariga koʻra, shu vaqtgacha 30 nafar namoyishchi politsiya tomonidan qoʻlga olingan. Politsiya kuch ishlatish bilan tahdid qilmoqda.
