Saudiya valiahdi: Mamlakatdagi koʻplab diniy cheklovlar Islomdan emas
Saudiya Arabistoni valiahdi Muhammad bin Salmon, Saudiya Arabistonidagi diniy cheklovlarning koʻpchiligi Islom aqidasidan kelib chiqmaganligini taʼkidlab, mahalliy din peshvolarini bunga ishontirishga jiddiy harakat qilganini bildirdi. Valiahd shahzoda Vashington Post gazetasining muharrirlari va muxbirlari bilan bir soat davom etgan uchrashuvda davlat ichki siyosati va ijtimoiy hayotda islohotlar oʻtkazish, jumladan Saudiya ayollarining jamiyatdagi imkoniyatlarini kengaytirish uchun qattiq harakat qilayotganini aytib oʻtdi.
“Menimcha, Islom aqlga mos, moʻʼtadil dindir, Islom yengil va oddiydir, odamlar uni har tarafga burishga urinadilar”, dedi u.
Muhammad bin Salmon bu ishlar Saudiya din peshvolari bilan muhim munozaralardan soʻng amalga oshirilganligiga urgʻu berdi. Uning taʼkidlashicha, u bunday cheklovlar islomiy eʼtiqodning bir qismi hisoblanmasligiga konservativ diniy rahbarlarni ishontirishga qattiq harakat qilgan va oqibatda din peshvolari bilan oʻtkazilgan uzoq munozaralar ijobiy natija bergan.
“Diniy elitada biz bilan hamfikr boʻlgan kishilarning soni kundan-kunga oshib borayotganligining sababi ham mana shudir”, deya qoʻshimcha qildi valiahd shaxzoda.
AQShga rasmiy tashrifi oldidan CBS telekanaliga intervyu bergan valiahd shahzoda Islomning moʻʼtadilligini taʼkidlab, Saudiya hukumatining ekstremizmga qarshi kurash yoʻlida qilayotgan ishlarini butun dunyoga eʼlon qilishini bildirgan edi.
Shuningdek u oʻtmishda ekstremizmning maktablarda va taʼlim sohalarida tarqalishi haqida toʻxtalib, endilikda ekstremistik gʻoyalarning taʼlim sohasiga taʼsir oʻtkazishiga hech qachon yoʻl qoʻymasligini ham taʼkidlab oʻtgan edi.
