Toshkentda xorijlik jangarilarni aniqlash texnikasi masalalari muhokama qilinadi
“Sputnik” saytining xabar qilishicha, Toshkent shahrida 21-23 fevral kunlari xorijlik jangari-terrorchilarni identifikatsiya qilish va shaxsini aniqlash texnikasi masalalariga bagʻishlangan milliy seminar boʻlib oʻtadi.
Bu haqda Yevropa Ittifoqining Oʻzbekistondagi vakolatxonasi rasmiy sayti xabar berdi. Seminar Markaziy Osiyo chegaralarini boshqarishga koʻmaklashish dasturi(BOMKA-9) doirasida tashkil etiladi.
Seminar davomida ekspertlar xorijlik jangari-terrorchilarni identifikatsiya qilish va shaxsini aniqlash boʻyicha ilgʻor tajribalar bilan oʻrtoqlashishadi, chegara-oʻtkazuv punktlarida jangari-terrorchilarni identifikatsiya qilish va shaxsini aniqlash metodologiyasini takomillashtirish boʻyicha chora-tadbirlar va tavsiyalar ishlab chiqiladi. Shuningdek, milliy idoralar tomonidan BMT Xavfsizlik Kengashining zoʻravonlik ekstremizmiga qarshi kurashish sohasidagi tavsiyalarining amalga oshirilishi boʻyicha qoʻshimcha amaliy harakatlar muhokama qilinadi.
Markaziy Osiyoda BOMKA dasturi 2003 yilda faoliyat boshlagan boʻlib, u mintaqa davlatlari oʻrtasida chegaralarni boshqarish sohasidagi hamkorlikni rivojlantirishga hissa qoʻshib kelmoqda. 2003-2018 yillar davomida dastur bajarilishiga 40,8 million yevro ajratilgan boʻlib, undan deyarli 5 million yevro dasturning 2015-2018 yillarni oʻz ichiga olgan toʻqqizinchi fazasini amalga oshirish uchun taqdim etilgan.
