Suriya boʻyicha Ostona uchrashuvining 8 turi nihoyasiga yetdi
Qozogʻistonda Suriya boʻyicha 8 tur uchrashuv boʻlib oʻtdi. Uchrashuvda tomonlar, mahbuslarni ozod qilish va mintaqani minalardan tozalash masalasida kelishib olishdi. Qozogʻiston tashqi ishlar vaziri Qayrat Abdrahmanov tomonidan oʻqib eshittirilgan soʻnggi bayonotda taraflarning Suriyadagi terrorchi (Jihodiy) guruhlarga qarshi kurashish boʻyicha qarorlari takror ifoda etildi.
Shuningdek, bayonotda delegatsiyalarning Suriyada zoʻravonlikni kamaytirish va 2018 yil 30 yanvar kuni Sochida oʻtkazilishi rejalashtirilgan “Suriya Milliy muloqoti” kongresiga tayyorgarlik uchun tartibli ravishda uchrashuv oʻtkazishga qaror qilganligi bildirildi. Abdrahmanov 9 tur Ostona uchrashuvi 2018 yil fevral oyida boʻlib oʻtishini ham eʼlon qildi.
Uchrashuvda ishtirok etgan manbalardan olingan maʼlumotlarga koʻra, Turkiya, Rossiya va Eron delegatsiyalari mahbuslarni ozod qilish va tarixiy maydonlardagi minalarning tozalanishi borasida kelishib olishgan. Rossiyaning tashabbusi bilan Sochi shahrida oʻtkazilishi rejalashtirilgan “Suriya Milliy muloqoti” kongresining sanasi 29-30 yanvar kuniga belgilangan.
Suriya muxolifati uchrashuvda Idlibda xavfsiz mintaqa tashkil qilishga kafil boʻlgan davlatlardan biri Rossiya delegatsiyasi bilan suhbat oʻtkazganligini maʼlum qildi. Muxolifatning bayonotida aytilishicha, Rossiya ularga hozirgi bosqichida mahbuslarni ozod qilish, yoʻqolgan shaxslarning oʻzlarini va yoki jasadlarini topishga erishish mumkinligini vaʼda qilgan. Ayni paytda, muxolifat vakillari Rossiya rasmiylariga baʼzi hujjatlarni taqdim qilganligi ham aytilmoqda.
Turkiston:
Ostona uchrashuvlarida Idlibda tinchlikni saqlash boʻyicha kelishuvga erishilganligi eʼlon qilinib, bunga Rossiya, Turkiya va Eron davlatlari kafil boʻlganligi aytib kelinmoqda. Biroq voqelik esa oʻzgacha, Idlib aholisi kafil davlatlarning oʻzlari tomonidan qirgʻin qilinmoqda. Asad rejimi nomidan kafil boʻlgan Rossiyaning Ostona urashuvidan bir kun oldin Idlibni havodan hujumga tutdi. Mahalliy manbalardan olingan xabarlarga koʻra, rus harbiy samolyotlarining hujumi oqibatida Idlibda tinch aholi vakillaridan 17 kishi halok boʻlgan va 35 kishi tanjarohati olgan.
Xullas, Idlib xavfsizligini oʻz zimmasi olgan davlatlardan Rossiya Idlibni havodan bombalayotgan boʻlsa, Eronga qarashli yollanma jangarilar yerdan hujum qilishni toʻxtatishmayapti. Turkiya esa, bularni koʻrib turgan boʻlsa-da, sukut saqlashni afzal bilmoqda.
