Atambayev Qozogʻiston bilan vaziyat yaxshilanishiga umid bildirdi
“Qozogʻiston bilan vaziyat izga tushadi, bu Qozogʻiston manfaatlariga ham mos tushadi”, – dedi Almazbek Atambayev Bishkekda boʻlib oʻtgan yakuniy matbuot anjumanida. Uning soʻzlariga koʻra, munosabatlarni yaxshilanishi “Qozogʻiston uchun ham, birinchi navbatda Rossiya uchun ham zarur”.
Atambayev navbatdagi prezidentlik va parlament saylovlarida “bizning ishimizga aralashishga hech kim jurьat eta olmasligi” uchun toʻgʻri yoʻl tutganini aytdi. Uning aytishicha, Qirgʻiziston “oʻzining ichki ishlariga aralashmasligi uchun” boshqalarga saboq berib qoʻydi.
“Shunday vaqtlar ham boʻldiki, 2010 yilgi saylovlarda Qozogʻiston milliy xavfsizlik qoʻmitasining maslahatchisi bu yerga kelib, pul tarqatdi. Shundan soʻng biz unga mamlakatga kirishni taʼqiqladik. Bu kabi ishlar endi takrorlanmaydi. Endi bizning mamlakatga nisbatan, boshqa mamlakatlarda vaziyatni tebratib qoʻyish osonroq… Biz hech kimga hech qachon hujum qilmaymiz. Ammo kerak boʻlsa gilamga tortishga qurbimiz yetadi”, -dedi Atambayev.
Qozogʻiston parlamenti rahbariyati Atambayevning soʻzlarini “maʼsuliyatsizlik” deya atadi.
Qozogʻiston parlamenti majilisi raisi Nurlan Nigmatulin Qirgʻiziston prezidenti Almazbek Atambayevning Bishkekdagi qarorgihida boʻlib oʻtgan yakuniy matbuot anjumanida bildirgan fikrlarini “maʼsuliyatsiz va populistik” deya atadi.
Nigmatulinning aytishicha, Qozogʻiston prezidenti Nursultan Nazarbayevchalik “hech kim Qirgʻiziston xalqini qoʻllab quvvatlamagan va yordam bermagan”.
“Qirgʻiziston xalqi Qozogʻiston yetakchisiga hamisha iliq va minnadorchilik bilan munosabatda boʻlganini bilamiz. Shu sababli Atambayevning populistik va maʼsuliyatsizlik bilan aytgan “quruq” gaplari xalqlarimizning birodorlik munosabatlariga ziyon yetkaza olmaydi”,- dedi Nigmatulin.
“Atambayevning oʻziga keladigan boʻlsak, hammaga maʼlumki, oʻzining prezidentlik yillarida birorta ham sohada, hoh siyosat, hoh iqtisod boʻlsin, ijobiy samaraga erisha olmadi. Ketar chogʻida siyosiy va ichki madaniyati mutloqo yoʻqligini namoyish qildi”,- deya bayonot berdi Qozogʻiston parlamenti quyi palatasi raisi Nigmatulin.
20 noyabr kuni Bishkekda boʻlib oʻtgan matbuot anjumanida lavozimini tark etayotgan Almazbek Atambayev Rossiya rahbari Vladimir Putindan “Qirgʻiziston-Qozogʻiston inqirozi”ga aralashishni soʻraganini maʼlum qildi. Qozogʻiston bilan chegaradagi vaziyat toʻgʻrisida gapirgan Atambayev yana bir bor “qamal” soʻzini ishlatdi. Shu bilan birga u qoʻshnilarga “kelajak uchun yaxshigina saboq berib qoʻyganidan” afsuslanmasligini taʼkidladi.
