Indoneziyada Hizb-ut-Tahrirning taʼqiqlanishi ulkan norozilikka sabab boʻldi
Indoneziya parlamenti bugun Hizb ut-Tahrir faoliyatini mamlakatda taʼqiqlash haqidagi qonunni muhokama qilish uchun yigʻilish oʻtkazdi. Parlamentdagi oʻnta partiyadan uchtasi qarshi ovoz berdi. Ammo qolgan yetti partiya vakillari tarafidan berilgan 314 ovoz bilan qaror qabul qilindi.
Mazkur qonun muhokama qilinayotgan paytda parlament binosi oldida oʻn minglagan musulmonlar Hizb ut-Tahrirning taʼqiqlanishiga qarshi norozilik namoyishi oʻtkazishdi. Hizb ut-Tahrir – Indoneziya tomonidan boshqarib turilgan norozilik namoyishida xalqlarning aksariyati olimlar, ziyolilar, siyosatchilar, biznesmenlar, shifokorlar, sobiq harbiylar, universitet professorlaridan iboratligi eʼtiborni tortdi. Bu qonun parlamentda qabul qilinadigan boʻlsa, ulamolar bunga norozilik sifatida mamlakat boʻylab namoyish oʻtkazishi aytilmoqda.
Parlamentda bu qonunning qabul qilinishi Hizb aʼzolariga 5 yildan tortib, umrbod qamoq jazosi berilishini anglatadi. Bunday dastur yoki qonun Indoneziya Gollandiyaning mustamlakasi boʻlgan davrida ham qabul qiingan emas.
Hizb ut-Tahrir – Indoneziyaning rasmiy notigʻi Muhammad Ismoil Yusanto Hizb ut-Tahrirning taʼqiqlanishi mavzusiga doir matbuot bayonoti berdi. Parlamentning qonunbuzarlikka qoʻl urayotganiga eʼtiborni jalb qilgan matbuot bayonotida xususan shunday deyiladi:
“Indoneziya hukumati adolatli sud oʻtkazmagan holda istibdodiy qaror bilan Hizb ut-Tahrirni taʼqiqlash yoʻliga oʻtdi. Bu hukumat Paygʻambar tariqati boʻyicha harakat olib borayotgan, jabr va zoʻravonlikdan uzoq boʻlgan fikriy harakatning ovozini noqonuniy yoʻllar orqali oʻchirmoqchi boʻlyapti. Holbuki, mustamlakachi davlatlar va ular oʻylab topgan gʻoyriislomiy tuzumlar, yaʼni kapitalizm va kommunizm asosiy tahdid boʻlib turgan bir paytda Islom tuzumi va uning tarafdorlari tahdid deya eʼlon qilinmoqda. Xalqaro valyuta fondi va Jahon banki kabi tarmoqlar mamlakatda qonuniy ravishda ish yuritar ekan, Islom daʼvosini koʻtarib chiqayotganlarga taʼqiq qoʻyilishi Indoneziya parlamentining qanday qaror qabul qilganligini koʻrsatib turibdi. Shuni unutmaslik lozimki, Indoneziya parlamenti tomonidan qabul qilingan bu qarorlar Islom daʼvosiga aslo toʻsiq boʻla olmaydi va bu adolatsiz qarorni qabul qilgan kishilar Allohning oldida javob berishadi”.
