Atambayev Oʻzbekistonga boradi
“Sputnik” xabariga koʻra, Qirgʻiziston prezidenti Almazbek Atambayev Oʻzbekiston prezidenti Shavkat Mirziyoyevning taklifiga binoan 2017 yil 5-6 oktyabr kunlari davlat tashrifi bilan Toshkentda boʻladi. Bu haqida Oʻzbekiston TIV matbuot-xizmati xabar qilgan.
“Oʻzbekiston prezidentining 5-6 sentyabr kunlari Qirgʻizistonga davlat tashrifi chogʻida boʻlib oʻtgan oliy darajadagi muloqotning davomi sifatida ikki davlat rahbarlari oʻzaro manfaatli hamkorlik aloqalarini yanada rivojlantirish istiqbollarini muhokama qiladilar, mintaqaviy va xalqaro siyosatning dolzarb masalalari boʻyicha fikr almashadilar”,- deb taʼkidlangan xabarda.
Tashrif dorasida davlat rahbarlari Toshkent shahrida boʻlib oʻtadigan Oʻzbekiston va Qirgʻiziston sanoat mahsulotlari koʻrgazmasiga tashrif buyuradilar.
Muzokaralar yakunlari boʻyicha prezidentlar Oʻzbekiston va Qirgʻiziston oʻrtasida Qoʻshma deklaratsiyani qabul qilishi kutilmoqda.
Tashrif doirasida turli sohalarda oʻzaro aloqalarni mustahkamlashga qaratilgan qator ikki tomonlama hujjatlar imzolanishi rejalashtirilgan.
